Han Almaty haıýanattar baǵyna Ońtústik Afrıka Respýblıkasynan ákelingen. Ol jergilikti aýa-raıyna, osyndaǵy ortaǵa tez beıimdelip, kelýshilerdiń súıikti janýaryna aınaldy.
Shırek ǵasyr ishinde Almaty zoobaǵynda Hannyń 12 urpaǵy dúnıege keldi.
- Qazir Hannan týǵan Batyr, Hanzada jáne Sultan atty kishkentaı kerikter zoobaq qyzmetkerleriniń qamqorlyǵynda jáne kelýshilerdi qýantyp júr. Al Hannyń basqa qulyndary Máskeý, Krasnodar ólkesi, Shymkent, Tashkent, Aqtóbe, Ferǵana haıýanattar baǵyna berilgen. Han – jaǵymdy ári jumsaq minezimen, erekshe kórkimen eń tanymal jáne súıkimdi janýarlarymyzdyń biri boldy, sondaı-aq zoobaq qyzmetkerleriniń jáne barsha kelýshilerdiń esinde qalady, - delingen habarlamada.
Zoobaqtyń málimetinshe, Han sońǵy kezderi ózin sergek sezingen, tábeti de jaqsy bolǵan. Jem-shóbin de tolyq jep taýysyp júrgen. Alaıda qarttyǵyna baılanysty azdap býyndary aýyrǵan.
- Han keshkisin óte belsendi boldy. О́zine berilgen jem-shóbin taýysyp jedi. Azdap aqsap júretin. Tańǵa jýyq ol jerge jatyp qaldy. Ádette, kerikter tolyq denesimen jerge jatpaıdy. Kerik úshin 25 jas – adamnyń 95 jasyndaı bolady. Biz ony bárimiz jaqsy kórdik, kelýshiler de ony jaqsy kóretin. Uzaq jyldar boıy Hanǵa qamqorlyq kórsetip, kútim jasaǵan barlyq qyzmetkerlerge alǵys aıtamyz, – dedi, "Tuıaqty janýarlar" seksııasynyń meńgerýshisi Balabek Mahatov.
Táýelsiz patologoanatom maman, Qazaq ulttyq agrarlyq zertteý ýnıversıtetiniń professory Amangeldi Maýlanov Hannyń jalpy jaǵdaıy jaqsy bolǵan, onyń boıynda ınfeksııalyq jáne baqsa da qaterli dert bolmaǵanyn aıtty.
- Keriktiń óliminiń sebebi – qartaıǵan jasqa baılanysty qaıtymsyz ózgerister ıaǵnı bıologııalyq qartaıý, - dedi ol.
