Osy oraıda biregeı ekojúıe retinde jumys isteıtin, elimizdegi startaptardy qoldaıtyn Astana Hub ınnovasııalar ortalyǵyn erekshe atap ótkim keledi. IT salasynyń damýyna jáne jańa startaptardyń paıda bolýyna tikeleı Astana Hub pen salaǵa jaýapty mınıstrliktiń úlesi zor. Degenmen biz bul jetistikterdi tek bastamasy dep qarastyrýymyz kerek. Álemdik naryqta tabysqa jetý úshin bizdiń ónimderimiz tek sapaly ǵana emes, sonymen qatar erekshe, suranysqa saı sheshimder bolýǵa tıis. Qazirgi ýaqytta bizdiń joba 13 elde qyzmet kórsetip, myńdaǵan balaǵa zamanaýı bilim metodıkasyn usynyp keledi.
Biz CodiPlay jobasy arqyly elimizdegi jas urpaqty tehnologııalardy meńgerýge baýlyp kelemiz. Bul joba oqýshylarǵa jasandy ıntellekt pen baǵdarlamalaýdy qarapaıym ári qyzyqty ádistermen úıretedi. Prezıdenttiń bilim berý júıesine AI tehnologııalaryn engizý týraly aıtqany óte ózekti. Jastarǵa bul daǵdylardy erte jastan úıretsek, olar tek tutynýshy ǵana emes, tehnologııalardy jasaýshy, ınnovator bolady. Bul – bizdiń eldiń ıntellektýaldy kapıtalyna salynǵan uzaq merzimdi ınvestısııa. Sıfrlyq saýaty bar jáne sıfrlyq daǵdylarǵa beıim balalardy daıyndaý arqyly elimiz IT salasynda kósh bastaı alady.
Prezıdenttiń jasandy ıntellekt etıkasy men onyń qaýipterin durys retteý qajettigi týraly aıtqanymen kelisemin. Bul salany damytýda biz tek ınnovasııalarǵa emes, olardyń durys qoldanylýyn qamtamasyz etýge de mán berýimiz kerek. Ol úshin zań men qadaǵalaý quraldaryn qarastyryp, tájirıbeli mamandardyń kómegine júginý arqyly qaýip-qaterdiń aldyn alý qajet.
Elimiz jasandy ıntellektini damytý men sıfrlandyrý arqyly álemdegi IT habtardyń biri bola alady. Biraq bul maqsatqa jetý úshin memleket, bıznes jáne bilim berý salasy birlese jumys isteýi qajet. Prezıdent aıtqandaı, jasandy ıntellekt – tek tehnologııa ǵana emes, qoǵamdy túbegeıli ózgerte alatyn qural. Biz osy múmkindikterdi tıimdi paıdalanyp, elimizdi jańa tehnologııalardyń kóshbasshysyna aınaldyra alamyz.
CodiPlay bul úderistiń bir bóligi bolýǵa daıyn. Biz jańa urpaqqa bolashaqtyń kiltin ustatyp, olardy ózgeristerdiń qozǵaýshy kúshi retinde daıyndaýǵa atsalysamyz.
Janádil Taldybaev,
CodiPlay jobasynyń negizin qalaýshy, IT kásipker
