Bir qyzyǵy, ol qalǵan ómirinde budan ózge eshteńe jazyp jarytpapty. Esesine Marsel topyraǵynda týǵan marǵasqa mýzykanttyń bul týyndysy 1795 jyly Fransııanyń ulttyq gımni retinde bekitilgen. Sodan bastap jigerli áýen búkil álemde bostandyq pen teńdiktiń sımvolyna aınaldy. Osylaısha, Rýje de Lıl bir túnde jazylǵan bir ǵana týyndysymen tarıhta qaldy.
Avtorǵa baǵynbaıtyn keıipkerler
Ádebıette minezi ábden daralanǵan qaharmandar tek óz qalaýymen ǵana áreket jasaıdy. Keı kezderi tipti, avtordyń yqtııaryn nazarǵa almaıdy.
Máselen, Anna Karenına Lev Tolstoıdyń áýelgi jospary boıynsha «adam túńilgendeı buzyq áıel» bolýǵa tıis edi. Shyn tulǵasyn, minezin daralaı kelgende tartymdy beıne bolyp shyqqan. Al «Evgenıı Onegındegi» Tatıana Pýshkınniń ózin tańǵaldyryp, «tosynnan» kúıeýge shyqty. Týrgenevtiń Bazarovy bolsa, avtordy amalsyz «baǵyndyryp», oǵan óz atynan kúndelik jazdyryp otyrǵan. Jazýshylar qaýymy personajdardyń mundaı «búliginen» kitaptyń eń qyzyq betteri týatynyn jasyrmaıdy.
Minsizdikke umtylys
Chehov «jazý óneri – syzyp tastaý óneri» dep beker aıtpasa kerek. О́ıtkeni óńdeý, jóndeý, túzeý, kúzeý – shyǵarmany shyńdaı túsedi.
Máselen, «Shegiren bylǵaryny» Balzak bastan-aıaq qaıta jazǵandaı, toǵyz ret adam tanyǵysyz ózgeriske ushyratqan. Al Gogol «Revızoryn» bes ret, Flober «Irodıadasyn» on ret, Gorkıı «Anasyn» alty ret túbegeıli ózgertip, jetildire túsken.
