Senat spıkeri jobaǵa qatysýshylarǵa iltıpat bildire kelip, Taldaý mektebi – jańa bilim meńgerýge arnalǵan oryn ǵana emes, sonymen qatar netvorkıngke, saraptamalyq baılanys ornatýǵa, ıdeıalarmen almasýǵa, biregeı jobalardy birlesip ázirleýge, ózekti máselelerdi sheshý joldaryn tabýǵa, túrli taldamalyq, áleýmettik jáne ózge de jobalardy uıymdastyrýǵa arnalǵan alań ekenin aıtty.
Sondaı-aq palata tóraǵasy atap ótkendeı, bul qoǵamdyq joba memlekettik qyzmette, bızneste, halyqaralyq uıymdarda jáne basqa da salalarda jumys isteıtin jas mamandardyń taldamalyq daǵdylaryn jetildirýge yqpal etedi.
Bıyl oqý baǵdarlamasy «Data-driven decision-making» taqyrybyna arnalyp otyr. Qatysýshylardy oqytý synı oılaý daǵdylary men taldaý ádisteri, analıtıka jáne Big Data, strategııalyq josparlaý jáne statıstıkalyq málimettermen jumys isteý, Data Governance & AI, analıtıkalyq materıaldardy daıyndaý qyrlary jáne halyqaralyq standarttar, «Data-driven decision-making» jáne mátinmen jumys isteý sııaqty 7 negizgi modýl boıynsha júrgiziledi.
«Prezıdentimiz Qasym-Jomart Toqaev analıtıkalyq qarym-qabileti joǵary mamandardyń jańa tolqynyn daıarlaýdyń mańyzdy ekenin birneshe ret atap ótti. Qazirgi tańda kez kelgen sheshim kóptegen faktordy eskerýdi talap etetini belgili. Sondyqtan analıtıka memlekettik organdar men bıznes úshin strategııalyq tetikke aınalyp otyr. Mundaı jaǵdaıda analıtıkalyq qabiletter men zamanaýı sıfrlyq múmkindikterdiń úılesim tabýy ereshe mánge ıe. Taldaý mektebi – osy strategııalyq mindetti iske asyrýǵa qosylǵan úles. Bıyl da qatysýshylardy ádettegideı óz salalarynda mol tájirıbesi bar belgili otandyq jáne sheteldik sarapshylar oqytady», dedi M.Áshimbaev.
Aıta keteıik, tórtinshi kezeńge qatysýǵa 700-ge jýyq ótinim kelip tústi. Baıqaý komıssııasynyń ótinimderdi qaraý nátıjesinde jobaǵa qatysýǵa 60 adam múmkindik aldy. Olar – analıtıkalyq qurylymdarda, memlekettik basqarý júıesinde, ulttyq kompanııalar men ǵylymı-zertteý ınstıtýttarynda, basqa da túrli salalarda tájirıbesi bar jáne PhD ǵylymı dárejesine ıe mamandar.
M.Áshimbaev óz dárisinde taldamalyq jumystyń tujyrymdamalyq qyrlaryna nazar aýdardy. Talqylaý barysynda memlekettik basqarý isinde sıfrlyq quraldardy qoldanýǵa jáne sheshimder qabyldaýǵa qatysty keıster taldanyp, trendter saraptaldy.
«Taldaý mektebiniń ıdeologııasy synı oılaýǵa, jańa sheshimder tabýǵa jáne elimizdiń qýatty ári ınnovasııalyq damýyna yqpal etetin beıstandart strategııalardy qurýǵa qabiletti mamandardyń jańa býynyn qalyptastyrýdy kózdeıdi», dep Senat tóraǵasy qarym-qabiletti arttyrý jolyndaǵy jeke tájirıbesimen bólisti.
Taldaý mektebindegi dáristerdiń bir ereksheligi – toppen jumys isteý daǵdylaryn damytý. Bul soft skill-di jetildirý úshin qatysýshylarǵa arnaıy shaqyrylǵan tálimgerler – naqty sala boıynsha sarapshylar, erikti negizde qatysatyn memlekettik qurylymdardyń, ǵylymı jáne halyqaralyq uıymdardyń ókilderi qoldaý kórsetedi. Sondaı-aq qatysýshylar bilim berý ınklıýzııasy, genderlik damý, balamaly energetıka, eńbek kóshi-qony sııaqty jeti baǵyt boıynsha birlesken jobalar daıyndaý úshin toptarǵa bólindi.
Tórtinshi kezeńniń alǵashqy kúninde Sinovation Venture jasandy ıntellekt ınstıtýtynyń prezıdenti, doktor Kaı-Fý Lı dáris júrgizdi. Al strategııalyq jáne daǵdarystyq kommýnıkasııalar jónindegi sarapshy Erbol Ismaılov komandalyq bilim berý, tyń tásilderdi tereń meńgerý jóninde fasılıtasııalyq sessııa ótkizdi.
Aldaǵy segiz aptada Nazarbayev University prezıdenti, professor Vakar Ahmad, «Pıshı, sokrashaı» kitabynyń avtory Maksım Ilıahov, Qazaqstan strategııalyq zertteýler ınstıtýtynyń dırektory Erkin Tuqymovtyń dáristeri josparlanǵan. Spıkerlerdiń qatarynda memlekettik organdar men halyqaralyq ǵylymı-zertteý uıymdarynyń ókilderi de bar. Naqty aıtqanda, Qazaqstan Prezıdentiniń keńesshisi Qýanyshbek Esekeev, Ulttyq bank tóraǵasy Tımýr Súleımenov, Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev, Strategııalyq josparlaý jáne reformalar agenttiginiń tóraǵasy Jandos Shaımardanov, «Otbasy banktiń» Basqarma tóraǵasy Lázzat Ibragımova dáris oqıdy.
Taǵy bir aıta keter jaıt, sabaqtar bıylǵy 1 naýryzǵa deıin ár senbi saıyn ótedi. Kezeń qorytyndysy boıynsha qatysýshylardyń taldaý materıaldarynyń jınaǵy shyǵarylady. Ol Parlament depýtattaryna jáne salalyq memlekettik organdarǵa usynym retinde jiberiledi.
Sarapshylardyń beıne dáristeri Taldaý mektebiniń resmı YouTube arnasyna jarııalanyp otyrady – https://www.youtube.com/@SchoolofAnalytics. Sondaı-aq atalǵan YouTube arnada Mekteptiń aldyńǵy úsh kezeńindegi dárister de qoljetimdi.
