Foto: Oqý-aǵartý mınıstrligi
Jekemenshik mektepterde oqıtyn az qamtylǵan otbasylardyń balalaryna áleýmettik kómek kórsetý bıylǵy jyldan bastalady. 30 jeltoqsanda Prezıdent Bilim jáne bala quqyqtaryn qorǵaý máseleleri jónindegi zańǵa qol qoıdy.
Zań memlekettik bilim berý tapsyrysy boıynsha oqıtyn oqýshylar úshin áleýmettik qoldaý sharalaryn keńeıtýdi kózdeıdi. Buryn «Jalpyǵa birdeı bilim berý» qorynan mektep kerek-jaraqtary men keńse taýarlaryn satyp alýǵa kómek tek memlekettik mektep oqýshylaryna ǵana kórsetilgen bolsa, endi jekemenshik mektep oqýshylaryna da qatysty bolady.
«Jańa zań aıasynda jergilikti atqarýshy organdarǵa menshik nysanyna qaramastan, áleýmettik osal otbasylardyń balalaryna áleýmettik kómek kórsetý quzyreti beriledi. Bul barlyq balalar úshin teń múmkindikterdi qamtamasyz etýge baǵyttalǵan mańyzdy qadam», dedi QR Oqý-aǵartý mınıstri Ǵanı Beısembaev.
Aıta keteıik, Memleket basshysynyń tapsyrmasy boıynsha 2023 jyldyń qyrkúıeginen bastap bastaýysh synyp oqýshylary men áleýmettik sanattaǵy 5-11 synyp oqýshylary úshin memlekettik mektepterde tegin ystyq tamaq uıymdastyryldy.
Bıylǵy oqý jylynda memlekettik mektepterde oqıtyn 1,7 mln-nan astam bala tegin tamaqpen qamtamasyz etilgen. «Jalpyǵa birdeı bilim berý» qory aıasynda 510 myń oqýshyny qural-jabdyqtarmen qamtamasyz etýge qosymsha 22,5 mlrd teńge bólingen.
