Ǵylymı ortalyq osy aralyqta 100-den astam balaǵa kúrdeli mega-endoprotezdeý otalaryn jasaý barysynda kishkentaı pasıentterdiń aıaq-qoldaryn saqtap qana qoımaı, el qataryna qosylýǵa orasan septigin tıgizdi. Osy oraıda, jyl saıyn elimizde osteosarkoma dertine shamamen 20-25 bala shaldyǵady desek, bul keseldiń 50%-dan astamy tize býynynda, 30% ıyq-býynyna jaqyn ornalasady.
Sońǵy jyldary súıek isikteri kezinde joǵary mólsherli hımıoterapııany engizýdiń arqasynda onyń basqa aǵzalarǵa shabýy tómendep, ómirler uzara túsken. Bul kóp jaǵdaıda, zaqymdanǵan aıaqtardy 90%-dan astam jaǵdaıda saqtap qalýǵa múmkindik berip otyr. Bir sózben aıtqanda, súıektiń sırek qaterli isigine dýshar bolǵan balalardyń asa bir asqynǵan jaǵdaıda bolmasa, aıaq-qoldary kesilmeıdi.
Qazirgi tańda osteosarkomany emdeýdiń jańa ádisterin engizý – em-dom tıimdiligin álemdik nátıjelerge jaqyndatýǵa múmkindik beredi.
Osyndaı aýyr da, erekshe kúrdeli operasııalardy atqaratyn PBHǴO №2 hırýrgıı bóliminiń meńgerýshisi, joǵary sanatty onkohırýrg, onkoortoped Bahram Jumadýllaev: «Ortalyq zamanaýı modýldik endoprotezderdi satyp alýǵa qol jetkizip, qarqyndy joǵary mólsherli hımıoterapııany qoldanýdyń arqasynda aǵzany saqtap qalatyn operasııalardyń sany artty. Sondaı-aq balalardaǵy osteosarkomany biriktirip emdeý nátıjeleri de jaqsardy. Atap óterlik jáıt, onkologııalyq endoprotezder ortopedııalyq protezderge uqsamaıdy, erekshe megaprotezderge jatady. Qazirgi tańda hırýrgııalyq emdeýdiń osy túri osteosarkomaǵa shaldyqqan balalardyń 90%-dan astamyna jasalynady, ol óz kezeginde balanyń áleýmettik beıimdelýine, jaǵdaıynyń jaqsarýyna múmkindik beredi», deıdi.
Elimizde aıaq-qoldy aman alyp qala otyryp, emdeý aıaqtalǵannan keıin jalpy saýyǵyp ketý jaǵdaılary – 71%. Bul nátıje osteosarkomany zertteý jónindegi halyqaralyq mýltıortalyqtar nátıjesiniń derekterimen saı keledi.
Sońǵy jyldary boıy jasynan qysqa balalarǵa jeke daıyndalǵan az ınvazıvti uzartqysh protezderdi qoldaný arqyly dene múshelerin saqtaý operasııalary engizildi.
Onkologııa salasyndaǵy eń kúrdeli operasııa tegin medısınalyq kómektiń kepildendirilgen kólemi negizinde tegin jasalady. Oǵan qosa Pedıatrııa jáne balalar hırýrgııasy ǵylymı ortalyǵynda aıaqqa ǵana emes, tize, ıyq, jambastyń qaterli isikterine de organ saqtaý operasııalary atqarylyp jatyr. Biregeı operasııalardyń nátıjesinde balalardyń aıaq-qoldary saqtalyp qana qoımaı, olardyń ómir súrý sapasy da jaqsardy. Búgingi kúni olar óz qurby-qurdastarymen birge mektepke baryp, ýnıversıtette oqyp, túrli qyzmette jumys atqarady Tipti, sportpen aınalysyp, jattyǵý zaldaryna, basseınderge baryp belsendi ómir súrip keledi. Turmys quryp 2-3 balanyń anasy jáne ákesi bolyp jatqan balalar da bar.
ALMATY
