Bekseıit Túlkıev – beıneleý óneri tarıhyna óz qoltańbasymen engen sheber sýretshi. Týma talant kenepke kóz tastaǵan kórermenin tap sol mekenge, dáp sol kezeńge ıirip áketetini bar. Sebebi onyń qalamynan órilgen kartınalar ómir shyndyǵy, ýaqyt tynysy, meıirim men adaldyq, aq pen qaranyń arpalysy sekildi máńgilik taqyryptardy arqaý etken. Taǵylymdy is-sharada 43 jas ǵumyrynda óner men sportty egiz órip, qos salada da aıtýly tabysqa jetken B.Túlkıevtiń ómir joly, shyǵarmashylyq órisi, kisilik kelbeti týraly estelikter aıtyldy.
Kesh aqyn Qasymhan Begmanovtyń mereıtoı ıesine arnaǵan jyr-tolǵaýymen ashylyp, jınalǵan qaýymǵa osydan 20 jyl buryn habar arnasy túsirgen derekti fılm usynyldy. Alǵash bolyp sóz alǵan Almaty qalasy ákiminiń keńesshisi Mamaı Ahetov, Memlekettik keńesshi Erlan Qarınniń quttyqtaý hatyn oqyp berdi.
«Kórnekti sýretshi, shyǵys jekpe-jeginiń sheberi Bekseıit Túlkıev – mádenıet pen sport salasyn damytýǵa úles qosqan birtýar tulǵa. Ol ulttyq beıneleý ónerinde óziniń qaıtalanbas qoltańbasyn qaldyrdy. Kóptegen kartınasy arqyly halyqtyń yqylasyna bólendi. Qylqalam sheberiniń eńbekteri – ulttyq mádenı muramyzǵa qosylǵan qundy qazyna. Sondaı-aq ol elimizde shyǵys jekpe-jegin damytýǵa zor eńbek sińirdi. Qazaqstannyń Taekvondo federasııasynyń tuńǵysh prezıdenti retinde jastardy sportqa baýlyp, ónegeli isterge uıytqy boldy. Onyń esimin jurt jadynda jańǵyrtý – barshaǵa ortaq paryz», delingen quttyqtaý hatta.
Qoǵam qaıratkeri, aqyn Nurlan Orazalın B.Ábdezulynyń ómiri men óneri haqynda: «Aıadaı aýyldan kelgen jap-jas jigit ónerlige baı Almaty deıtin qalany ózine jalt qaratqany esimizde. Onyń kartınalaryn eń alǵash «Jiger» festıvalinde kórip, jańa baǵyty, jańa baǵdary bar, boıyn tasqyndy shabyt kernegen talantty tanyǵan edik. Sol jyly «Lenınshil jas» (qazirgi «Jas Alash») gazetine О́tegen Oralbaev Bekseıit týraly úlken maqala jazdy. Bul maqalamen tanysqan zerdeli oqyrman keıipkerdiń álemine úńile bastady. Qazaq qylqalamynyń jalǵasyndaı bolǵan jańa býynnyń kórnekti ókilimen jurt osylaı qaýyshty. «1941 jyldyń maýsymy» deıtin trıptıhyna uzaq telmirip, jap-jas jigittiń bıik tanymyna, saýattylyǵyna qatty tańǵalǵanym bar», dep eske aldy.
B.Ábdezulymen qatar oqyǵan kórnekti sýretshi Jumaqyn Qaıranbaı: «Adamdy armanǵa jeteleıtin – talant pen talap. Bekseıitte munyń ekeýi de bar edi. Sondyqtan bolar, ol ózin óner men sportta qatar moıyndatty. Bir isti qolǵa alsa, túbine deıin aparmaı tynbaıtyn. Jazǵan jumystary talaı mýzeıdiń tórinde tur, shetel mýzeılerinde turǵan týyndylary da az emes. Onyń qolda bar kartınalaryn jaqyndary saqtap otyr. Bekeńniń atynda shaǵyn bolsa da mýzeı ashylyp, ónegesin urpaqqa úlgi etsek, quba-qup. Mundaı adamdardy jastarǵa úlgi retinde kórsete bilýimiz kerek. Átteń, jalyndap turǵan shaǵynda úzilip ketti», dep tebirendi.
Ulttyq beıneleý ónerine alǵash sıýrealızm baǵytyn ákelgen sýretshi týraly Janǵara Dádebaev, Tuńǵyshbaı Jamanqulov, Beken Ybyraıym, Ermahan Shaıhyuly, Baýyrjan Jaqyp, Raqymǵalı Qul-Muhammed sekildi azamattar estelik aıtty. Jıyn sońynda baspasóz betterinde jarııalanǵan maqalalar, sýretshiniń tutas shyǵarmalary engen albom-kitap tanystyryldy.
ALMATY
