Úkimet basshysynyń aıtýynsha, agrarlyq sektor men óńdeýshi salada sońǵy 10 jyl ishindegi eń qarqyndy ósim tirkeldi.
«Munaı óndirý kólemi 2 mln 400 myń tonnaǵa tómendep, Jalpy ishki ónimniń ósý qarqynyna keri áserin tıgizdi. Bul kóbine elimizdiń OPEK+ sheńberindegi mindettemelerine jáne iri ken oryndaryndaǵy kúrdeli jóndeý jumystaryna baılanysty boldy», dedi Úkimet basshysy.
Salalar boıynsha statıstıkalyq ósý kórsetkishteriniń naqty nátıjeleri mynadaı:
- 29 iri zaýyt salyndy. Olardyń qatarynda Qostanaı oblysynda shoıyn quıý; Almaty oblysynda volfram jáne jylý oqshaýlaǵysh materıaldar óndiretin; Shymkentte baǵaly metaldardy óńdeý; Qaraǵandy oblysynda katodty mys, avtomobıl shınalary men turmystyq tehnıka shyǵaratyn jáne basqa da kásiporyndardy atap kórsetýge bolady. Saran qalasynda zamanaýı óndiristerdiń iske qosylýy oǵan monoqalalar sanatynan shyǵýǵa múmkindik berdi.
- 26 mln tonnadan astam astyq, 3 mln tonnadan astam maıly daqyldar jınaldy. 4 mln tonna astyq eksportqa jóneltildi.
- Alǵash ret elimizde 19 mln sharshy metr turǵyn úı salyndy.
- 397 densaýlyq saqtaý, 298 bilim berý nysany boı kóterdi.
- 11 myń orynǵa arnalǵan 40 stýdenttik jataqhana paıdalanýǵa berildi.
- Júk tasymalynyń kólemi ótken jyly 10%-ǵa ósip, shamamen 1 mlrd tonnaǵa jetti.
- Transkaspıı halyqaralyq kólik baǵyty boıynsha konteınerlik tasymaldaý 2,7 esege ulǵaıdy.
- Qurylys jáne jóndeý jumystarymen 12 myń shaqyrym avtomobıl joldary jáne 2 myń 800 shaqyrym temirjol qamtyldy.
- Almaty, Qyzylorda jáne Shymkent áýejaılarynda úsh jańa termınal paıdalanýǵa berildi.
- Qosymsha 300 myńnan astam adam gazben qamtylyp, 200 myńnan astam adam ortalyqtan beriletin sý júıesine qosyldy.
- 542 shaqyrym jylý jelileri men 55 jylý kózi jańǵyrtylyp, 6,5 myń shaqyrym ınjenerlik jeliler jóndeldi.
- Jalpy qýaty 700 MVt-tan asatyn qosymsha elektr qýatyn óndirý kózderi iske qosyldy.
- Eginshiler sýarmaly sýmen tolyq kólemde qamtamasyz etildi. Aral teńizine 2 mlrd
600 mln. tekshe metr sý jiberildi. Bul ortasha jyldyq kórsetkishten edáýir joǵary. - Jalpy uzyndyǵy 400 shaqyrymnan asatyn 80 sý arnasyn jańǵyrtý jumystary aıaqtaldy. Sý únemdeý tehnologııalarymen qamtylǵan egis alqaby 1,5 esege artyp, 470 myń gektarǵa deıin jetkizildi.
- Investısııalyq shtabta jalpy quny 50 mlrd dollar bolatyn 115 joba boıynsha problemalyq máseleler tez arada sheshimin tapty.
Aıta ketý kerek, Investısııalyq shtab istiń múddesin nazarǵa alyp, bıýrokratııalyq máselelerge qaramastan, elge qajetti jobalardy der kezinde bastaýǵa múmkindik beretin sheshimderdi qabyldap jatyr.
Ári qaraı ol iskerlik ahýaldy jaqsartý úshin naqty problemalyq keıster negizinde zańnamalyq ózgeristerdi ázirleıdi. Qazirgi tańda 97 túzetý boıynsha osyndaı jumys júrip jatyr.
Oljas Bektenovtyń aıtýynsha, óńirler bólinisinde ótken jyldyń qorytyndysy boıynsha eń joǵary ekonomıkalyq ósim Soltústik Qazaqstan, Qaraǵandy, Túrkistan, Qyzylorda oblystary men Astana jáne Shymkent qalalarynda tirkelgen. Negizgi kórsetkishterdiń tómen dınamıkasy Ulytaý, Atyraý, Batys Qazaqstan, Jambyl oblystarynda qalyptasty.
