Foto: egemen.kz/ Erlan Omar
Úkimettiń keńeıtilgen otyrysynda osylaı degen Prezıdent Úkimet pen ákimderge bıýdjet qarajatyn bólerde jeti ret ólshep, bir ret kesýge úndedi.
«Elimizde jańa ári barynsha qatań bıýdjet erejeleri qoldanysqa engizilgenine eki jyl boldy. Alaıda, shyn máninde, bul júıe jumys istep turǵan joq. Nelikten olaı boldy? Oǵan Úkimet ózi jaýap berýge tıis. Úkimet usynǵan sharalar bıýdjetti Ulttyq qordan qosymsha qarjy almaı-aq tolyqtyrýǵa múmkindik beredi. Biraq naqty eseptep, janama faktorlardyń bárin eskerý kerek. Sol sebepti jańa Bıýdjet jáne Salyq kodeksterin tyńǵylyqty ázirlep, qysqa merzimde qabyldaý mindeti tur», dedi Memleket basshysy.
Qasym-Jomart Toqaev memleket qarjysyn barlyq deńgeıdegi bıýdjetke rasıonaldy ári ádil bólýdiń mańyzy zor ekenine toqtaldy.
«Tipti aýyldyq okrýgterge deıin qamtylýǵa tıis. Jalpy sıpattaǵy transfertterdi eseptegen kezde barlyq dısproporsııany eskergenimiz jón. Respýblıkalyq bıýdjetten, eń aldymen, kenjelep qalǵan belgili bir óńirdi jalpy eldiń damý deńgeıine jaqyndatatyn jobalar qarjylandyrylýǵa tıis. Áıtse de barsha aımaqtyń máseleleri men qajettilikteri Úkimettiń jiti nazarynda bolýy kerek. О́ńirlerdiń damý qarqyny báseńdeýine jáne áleýmettik-ekonomıkalyq jaǵdaıdyń nasharlaýyna múldem jol berýge bolmaıdy», dedi Prezıdent.
