Osyǵan oraı búgin toqsan jylǵa tarta tarıhy bar Abaı mýzeıinde mereıtoılardyń bastaýy retinde mádenı-tanymdyq saltanatty is-shara «Abaı álemdik oıdyń alyby» jáne «Abaı beıneleý ónerinde» taqyryptaryndaǵy kórmelerdiń tusaýy kesildi. Sharada sóz alǵan Abaı oblysy ákiminiń orynbasary Jasulan Sársebaev, Abaı mýzeıiniń dırektory Ulan Saǵadıev, Abaı oblysy ardagerler keńesiniń tóraǵasy Murat Alın Abaı óńirine tanymal zııaly qaýym ókilderi men mádenıet jáne óner mekemeleriniń qyzmetkerlerin Abaı toıymen quttyqtap, lebizin jetkizdi.
Saltanatty shara aıasynda QR Mádenıet salasynyń úzdigi, dástúrli ánshi Qaırat Qabyshev oryndaýynda Abaıdyń áni «Qarańǵy túnde taý qalǵyp», Ámire Qashaýbaev atyndaǵy memlekettik fılarmonııa ánshisi Qaırat Qamıdoldın Abaıdyń áni «Segiz aıaq» týyndysyn shyrqady. Jınalǵan kópshilik Abaı atyndaǵy mýzykaly-drama teatrynyń «Jaza-Naza» tragedııasynan úzindini tamashalady.
Abaı Qunanbaıulynyń 180 jyldyǵyna arnalǵan «Abaı-álemdik oıdyń alyby» atty kórmede mýzeı qoryndaǵy kitaptar men qoljazbalar, estelikter, taqyrypqa baılanysty turmystyq zattar men eleýli eksponattar kórermen nazaryna usynyldy. Hakim Abaıdyń 1909 jyly Sankt-Peterbýrgte basylǵan tuńǵysh óleńder jınaǵy, 1922 jyly Qazan, 1933 jyly Qyzylorda qalalarynda jaryqqa shyqqan kitaptary oryn aldy.
El Prezıdenti Q.Toqaevtyń tapsyrmasymen jaryq kórgen A.Qunanbaıuly shyǵarmalarynyń álem tilderine aýdarylǵan 10 tomdyǵy, Uly aqynnyń ár jyldary atalyp ótken mereıtoılaryna oraı Abaı mýzeıiniń asyl qoryna tabystalǵan kádesyılar da shara meımandarynyń erekshe tańdanysyn týdyrdy.
Danyshpan aqyn mereıtoıy aıasynda Abaıdyń «Jıdebaı-Bórili» memlekettik mýzeı-qoryǵynda ekinshi kórme «Abaı beıneleý ónerinde» dep atalady. Munda elimizge belgili qylqalam sheberleri Janataı Shardenov, Nurbulan О́tepbaev, Qaıyr Orazǵalıev, Ádilqaıyr Jantasov syndy sýretshilerdiń, Abaı tulǵasyn aıshyqtap Alashymen qaýyshtyrǵan tańdaýly sýretter qoıylǵan. Abaı tulǵasyn somdaý arqyly qazaq beıneleý ónerin baıytqan bul týyndylar Abaı mýzeıiniń asyl qoryn ǵana baıytyp qoımaı, abaıtaný arnasyn keńeıte túsetini anyq.
«Alys-jaqynnan Abaıyn tanýǵa asyǵyp keletin qonaqtardyń kóńil tarazysyna keskindeme, grafıka, kesteleý jáne taǵy basqa tehnıkamen jasalǵan F.Hasenov, N.О́tepbaev, S.Sýhov, Á.Jantasov, O.Qaıyr, M.Baqytbekova, T.Shapaǵat, A.Belov, N.Jarqynbaev sııaqty sýretshilerdiń tyń týyndylary usynyldy. Bul týyndylar mýzeı qoryna sońǵy jyldary túskendikten osyǵan deıin mýzeı ekspozısııasy men kórmelerge shyqpaǵan týyndylar» - deıdi Abaı mýzeıiniń dırektory Ulan Saǵadıev.
Uzaq jyldar boıy uly aqyn murasyn jan-jaqty nasıhattap otyrǵan Abaı mýzeıi alǵash irgetasyn kótergen kúnnen bastap aqyn taqyrybyndaǵy beıneleý óneri týyndylarymen tolyǵyp keledi. Búgingi kúni mýzeı qorynda 900-den asa beıneleý óneriniń tańdaýly týyndylary saqtalǵan. Abaı taqyryby qashanda óner qaıratkerleri úshin únemi shyǵarmashylyqtyń qaınar kózi bolyp, qylqalamdy serik etken jandarǵa erekshe shabyt syılap keledi. Ýaqyt ótken saıyn aqyn tulǵasy bıiktep qana qoımaı onyń kindik qany tamǵan týǵan jeriniń tabıǵaty qylqalam ıelerin tolǵandyryp, dúnıege talaı týyndyny týdyrýǵa arqaý boldy.
