Foto: Vladımır Tretıakov
Dárigerler 45 jastaǵy er adamnyń mıy ólgenin anyqtaǵannan keıin, týystary qaıtys bolǵan Almaty oblysynyń týmasynyń aǵzalaryn alýǵa ruqsat bergen. Olardyń kelisiminiń arqasynda Qazaqstannyń 4 birdeı azamatynyń ómiri ajaldan arashalanatyn bolsa, olardyń arasynda «dılatasııalyq kardıomıopatııa (ýytty)» deıtin aýyr júrek dertine dýshar bolǵan 43 jastaǵy er adam da bar. Naýqas 5 jyl boıy energetıkalyq sýsyndarǵa mólsherden tys qumarlanyp, dári-dármek terapııasyn qabyldamaıtyn júrek qyzmeti jetkiliksizdiginiń sońǵy satysyna jetken.
Naýqasta azdaǵan dene qımylynyń ózinde aýa jetispeýshiligi, jatqan kezde entigýi órship, tez sharshaý men jalpy álsizdik mazalaǵan. Densaýlyǵynyń nasharlap bara jatqany 2023 jyldyń jeltoqsanynan baıqala bastaǵan.
«Elimizde kardıohırýrgııa men kardıoreanımasııanyń damý deńgeıi júrekti transplantasııalaý operasııalarynda oń nátıjelerge qol jetkizýge múmkindik beredi. Iýrıı Vladımırovıch bastaǵan UMC komandasyna kómek pen qoldaý kórsetkeni úshin alǵysymyz sheksiz. Organdardy transplantasııalaý boıynsha operasııalar medısına qyzmetkerleriniń joǵary biliktiligin talap etedi», deıdi Kardıologııa jáne ishki aýrýlar ǴZI Basqarma tóraǵasy Marat Pashımov.
Marat Orynbasaruly donordyń týysqandaryna da alǵysyn bildire otyryp, donorlyqqa óz erkimen kelisim berý, adamdardyń ómirin saqtap qalýǵa daıyn bolý – adamgershilik pen meıirimdiliktiń úlgisi ekendigin, aǵzalaryn alýǵa kelisim bergen donordyń týystarynyń isi zor saýapqa ıe ekendigin atap ótti.
«Naýqastyń jaǵdaıy operasııanyń aýyrlyǵyna sáıkes qalypty. Dınamıka turaqty. Onyń joly bolyp, oǵan donor tabyldy. Keıbireýler aǵzany jyldar boıy kútýi múmkin, biraq olar uzaq kúte almaıdy. Munyń bári sáıkes donordyń bolýyna baılanysty. Pasıentterdiń kópshiligi, ókinishke oraı, transplantasııaǵa jetpeı qaıtys bolady. Júrek transplantasııasynsyz ómir súrý uzaqtyǵy tym qysqa. Aýyr júrek aýrýlary tez órshıdi jáne shuǵyl emdeýdi qajet etedi», deıdi klınıka basshysy.
Instıtýttyń kardıohırýrgııa bólimshesiniń meńgerýshisi Rústem Tóleýtaev: «Júrek almastyrý – asa kúrdeli operasııalardyń biri, alaıda bizdiń jınaqtaǵan tájirıbemiz, mashyǵymyz, klınıkamyzdyń tehnıkalyq jaraqtandyrylýy olardy joǵary deńgeıde oryndaýǵa múmkindik beredi», deıdi.
Erekshe atap óterlik jáıt, máıittik donordan eki búıregi, ókpesi, men kóz qabyǵy alyndy. Búırek Jetisý oblysynyń turǵyny 17 jastaǵy naýqasqa A.Syzǵanov atyndaǵy Ulttyq hırýrgııa ǵylymı ortalyǵynda jáne astanalyq 18 jastaǵy pasıentke University Medical Center – de transplantasııalandy, ókpe – UMC-te qostanaılyq 43 jastaǵy pasıentke, kóz qabyǵy keratoplastıkasy – eki resıpıentke transplantasııalandy.
Qazaqstanda 2025 jylǵy 10 qańtarda júrek transplantasııasynyń kútý paraǵynda 140 eresek adam men 5 bala tur.
