Foto: gov.kz
Saýda jáne ıntegrasııa mınıstri Arman Shaqqalıev qaladaǵy iri saýda jelilerin aralap, saýda sýbektileriniń ókilderimen kezdesti. Dúken sórelerindegi otandyq ónimderdiń úlesin arttyrý máselesi talqylandy. Mınıstr Almatydaǵy saýda jelileriniń jalpy assortımentiniń eleýli bóligin otandyq ónimder quraıtynyn atap ótti. Áleýmettik mańyzy bar taýarlar, ásirese sút ónimderi, joǵary úleske ıe. Mysaly, Almaty dúkenderindegi sút ónimderiniń 97%-y Qazaqstanda óndirilgen.
«Biz otandyq fermerlermen jáne óndirýshilermen tyǵyz jumys isteımiz, olardyń ónimderin saýda jelilerimizge jetkizýge kúsh salyp jatyrmyz. Iri saýda jelilerindegi kókónisterdiń barlyǵy qazaqstandyq fermerlerdiń ónimi. Sondaı-aq, qus eti men ósimdik maıy sııaqty basqa da áleýmettik mańyzy bar ónimderdiń úlesin arttyrý mańyzdy qadam bolyp tabylady», dedi mınıstr.
Otandyq óndirýshilerdi odan ári qoldaý maqsatynda mınıstr birqatar bekitilgen mindettemeler týraly málimdedi. Atap aıtqanda, «Qazaqstanda jasalǵan» degen arnaıy belgilerdiń bolýy mindettelgen. Sonymen qatar, ishki saýdany qoldaý fýnksııasynyń zańnamalyq túrde Saýda mınıstrligine berilýi otandyq óndirýshilerge úlken múmkindik bolyp otyr. Bul shara memlekettik qoldaý alǵan saýda obektilerine sóre keńistigin 20%-ǵa arttyrýdy mindetteıdi. Endi dúken sóreleriniń keminde 50%-y otandyq azyq-túlik ónimderimen, al keminde 20%-y turmystyq taýarlarmen toltyrylýy tıis. Bul taýarlar tutynýshylar úshin kórneki ári qoljetimdi jerlerge ornalastyrylýy kerek.
«Tutynýshylardy aldaýǵa jol bermeý úshin biz taýarlardyń sapasy men ornalasýyna qoıylatyn talaptardy kúsheıttik. Mysaly, taýarlar durys kórshilestik qaǵıdaty boıynsha ornalastyrylýy tıis: sút ónimderi sút sýsyndarymen, al maı – maıdyń balama túrimen qatar turmaýy qajet», dep qosty Arman Shaqqalıev.
Mınıstr, sondaı-aq, Almatydaǵy saýda ortalyqtarynda otandyq óndirýshilerdiń taýar kórmelerin uıymdastyrýdy usyndy. Bul shara tutynýshylardyń sapaly ári qoljetimdi otandyq ónimderge degen suranysyn arttyrýǵa múmkindik beredi. Qazirgi ýaqytta Almatyda 11 iri saýda jelisi jáne 3500-den astam shaǵyn dúken jumys isteıdi. Osy bastamalar jergilikti óndirýshilerdiń ónimderiniń dúken sórelerinde keńinen usynylýyna yqpal etedi.
