Foto: Astana qalalyq soty
Almaty oblysy (qazirgi Jetisý oblysy) Qaratal aýdandyq soty turǵyn úıdi burynǵy kúıeýiniń atyna jer telimimen qaldyryp, burynǵy áıeline úıdiń jarty quny – 940 myń teńgeden astam somany tóleýge mindettegen.
«Azamattarǵa arnalǵan úkimet» memlekettik korporasııasynyń fılıaly úıdiń daýly jartysyn talap qoıýshynyń atyna tirkeýden bas tartqan, sodan keıin ol bul sheshimge kelispeı, sotqa shaǵymdanǵan.
«Sot isti qaraı kele, úı men jer telimi buryn erli-zaıyptylardyń ortaq menshigi retinde tirkelgendikten, múlikti tirkeýden bas tartqan memlekettik organnyń áreketin zańsyz dep tapqan. Talap qoıýshy usynǵan, onyń burynǵy áıeline tıesili múliktiń ekinshi jartysyna quqyǵyn rastaıtyn qujattar múlikti bólý týraly sot sheshiminiń oryndalǵanyn kýálandyrady», delingen Joǵarǵy sot habarlamasynda.
Sot «Azamattarǵa arnalǵan úkimet» memlekettik korporasııasy fılıalyna sot aktisi zańdy kúshine engen kúnnen bastap bir aı ishinde úıdiń jartysyn memlekettik tirkeýden ótkizýdi mindettedi. Endi memlekettik organ osy mindettemeniń oryndalǵany týraly sotqa habarlaýy tıis.
Sot sheshimi kórsetilgen merzimde oryndalmasa jaýapkerge 1 aıǵa deıingi ýaqyt belgilep, 50 AEK mólsherinde aqshalaı aıyppul salýǵa quqyly.
Qaýly zańdy kúshine endi.
