Yntymaqtastyq ilgerileı túsýde

Taıaýda Máskeýde jańadan qurylǵan Eýrazııalyq ekonomıkalyq odaq (EAEO) formatynda Eýrazııalyq ekonomıkalyq komıssııa Keńesiniń alǵashqy otyrysy ótip, oǵan Qazaqstan Respýblıkasy Premer-Mınıstriniń birinshi orynbasary Baqytjan Saǵyntaev qatysty, dep habarlady Premer-Mınıstrdiń baspasóz qyzmeti. Komıssııa Keńesiniń kezekti oty­rysynyń kún tártibine EAEO qyzmetiniń tıimdiligin qamtamasyz etýge baǵyttalǵan neǵurlym kó­keıkesti máseleler engizildi. Keńes otyrysynyń kún tártibindegi negizgi máselelerdiń biri Qyrǵyz Respýblıkasynyń EAEO-ǵa qosylý sharty týraly hattamalar jobasyn daıyn­daý máselesi boldy. Biz óza­ra tıimdi sheshimderge qol jet­kizdik jáne bútindeı alǵanda, Qyr­ǵyzstannyń qosylýy týraly hattamalar daıyn. Eýrazııalyq ekonomıkalyq odaqty ul­ǵaı­tý, jalpy ekonomıkalyq keńistikti keńeıtýdiń syrtynda, ıntegrasııalyq bir­les­tiktiń tartymdylyǵyn qamta­ma­syz etedi. Odaqqa múshe memleketterdiń ekonomı­ka­larynyń damýy úshin qosym­sha turaqtylyq beredi. Oǵan Odaq­taǵy ónerkásiptik jáne agro­óner­kásiptik baılanystar­dy tereńdetý, kólik-logıstıkalyq, kóliktik áleýetti damytý negiz bolady. Qazirgideı kúrdeli ekonomıkalyq jaǵdaıda bular óte mańyzdy faktorlar, dep atap ótti Baqytjan Saǵyntaev. Otyrys barysynda árbir múshe memleketter úshin jeke-jeke, sondaı-aq, bútindeı odaq úshin negizgi saýda áriptesterimen aradaǵy halyqaralyq ynty­maq­tastyqty damytýǵa baǵyttalǵan máseleler qaraldy. Bul máse­le 6 aqpanda Eýrazııalyq úkimet­aralyq Keńestiń úkimet basshylary deńgeıindegi otyrysynda talqylanatyn bolady. Odan arǵy jerde Eýrazııalyq ekonomıkalyq odaqtyń halyqaralyq ynty­maqtastyǵyn damytýdyń negizgi vektorlary anyqtalmaq. Sol sııaqty Baqytjan Sa­ǵyn­taevtyń aıtýynsha, 2015-2016 jyldarǵa arnalǵan jeńil ónerkásip ónimderin tańbalaýdyń qanatqaqty júıesin satylap engizý máselesi boıynsha ortaq túsinistikke qol jetkizildi. Atap aıtqanda, bastapqy satyda kıim jáne tabıǵı teriden jasalǵan buıymdardy tańbalaý jóninde sheshim qabyldandy. Bul máseleni de 6 aqpanda úkimet basshylary qaraıtyn bolady. Eýrazııalyq ekonomıkalyq odaqtyń Keden kodeksiniń jobasyn daıyndaý jónindegi jumystar barysy da qaraldy. Ony qabyldaý kedendik deklarasııalaýdy elektrondy túrde júzege asyrýǵa jaǵdaı jasaıdy, al ol óz kezeginde kedendik tazartýdan ótý ýaqytyn jedeldetedi jáne sol arqyly bıznes úshin salmaqty jeńildetedi. Onyń syrtynda Eýrazııalyq ekonomıkalyq odaqtyń tıimdi qyzmetin qalyptastyrýǵa baǵyt­talǵan jekelegen sheshimder de qabyldandy. Atap aıtqanda, syrtqy ekono­mıkalyq qyzmetke qatysýshylar úshin saýda prosedýralaryn qarapaıymdandyrý jáne júkte­meni tómendetý maqsatynda «Biregeı tereze» mehanızminiń negiz­gi baǵyttaryn damytýdy júzege asyrý jónindegi is-sharalar jospary bekitildi.