Sýretti túsirgen – Jangeldi ÁBDIǴALYM
Qazaq kınosynyń kóshi Mádenıet jáne aqparat mınıstrligi jáne Kıno ortalyǵynyń qoldaýymen jolǵa shyqty. Kórermen nazaryna otandyq birneshe fılm usynylady.
«Kórsetilimdi Qaraǵandy oblysynan bastaýymyzdyń ózindik syry bar. Bul aımaq óndiristiń qaınaǵan ortasynda ornalasqan. Bıylǵy jyldy Prezıdentimiz Qasym-Jomart Toqaev Jumysshy mamandyqtary jyly dep jarııalaǵany belgili. Sol sebepti de aýqymdy sharany osy aımaqtan bastaýymyzdyń rámizdik máni bar. Qaraǵandydan bastap elimizdiń ár buryshynda qazaq kınosynyń kúnderin ótkizý otandyq kınematografııany ilgeriletýge serpin syılaıdy. Sebebi árbir fılmniń eń basty jeńisi – onyń óz kórermenin tabýy. Bizdiń maqsatymyz da ulttyq kınony halyqqa qoljetimdi etý», deıdi Kıno ortalyǵy basqarma tóraǵasynyń kınojobalar monıtorıngi jónindegi orynbasary Ádilet Omarov.
Uıymdastyrýshylar otandyq kınonyń kókjıegin keńeıtip júrgen otandyq kınogerlerdiń jetistigin el-jurt bilse deıdi. Osylaısha, aýdan-qala men shalǵaı aýyldaǵy aǵaıyn el tarıhy men mádenıetin aıshyqtaıtyn úzdik fılmderimen qaýyshady.
Buǵan deıin Kıno ortalyǵynyń qoldaýymen 117 kartına jaryqqa shyqty. Onyń 72-si – kórkem, 37-si – derekti, 8-i – anımasııalyq fılm. Prokatqa shyqqan týyndylardyń da qatary kóbeıip keledi.
«Kıno kúnderi aıasynda kórsetiletin «Qajymuqan» ulttyq rýhymyzdy asqaqtatsa, «Jambyl. Jańa dáýir», «Dos-Muqasan» fılmderi arqyly tulǵalarymyzdyń júrip ótken jolyna qanyǵady. «Operasııa Nabat», «Vremıa patrıotov» quqyq qorǵaýshylarymyzdyń eńbegin kórsetip, Otanǵa degen súıispenshilikti arttyrady. «Bokser» fılminiń basty prototıpi Serik Sápıev ekenin de aıta ketý kerek. «Baýyryna salý» dep atalatyn kınoda dástúrimiz dáripteledi. Kishkentaı kórermenderge arnalǵan «Taıqazan» dep atalatyn anımasııalyq fılm de nazarlaryńyzǵa usynylady. «Almaty, ıa lıýblıý tebıa!», «Sońǵy úkim», «Dala qasqyry», «Stop, noch», «Shýlama» fılmderiniń de aıtar oıy bar. Bıyl taǵy onnan asa týyndy prokatqa shyǵady dep josparlanyp otyr», deıdi Á.Omarov.
«Saryjaılaý» kınoteatrynda Mádenıet jáne aqparat mınıstrliginiń, Ulttyq kınony qoldaý ortalyǵynyń qoldaýymen túsirilgen «Qajymuqan» kınosy kórsetildi.
Rejısser Qanaǵat Mustafın tarıhı fılm ssenarııine 2012 jyly kirisip, taqyrypty 10 jyldan asa zerttepti. Túsirilimi 2020 jyly bastalǵan kınotýyndy byltyr kórermen nazaryna usynylǵan.
«Osy bir fılmdi túsirý úshin kóp júgirdim. Qoldaý tappadym. Sóıtip júrgende otandyq kınony qoldaý ortalyǵy ashyldy. Birden ssenarıimdi aparyp, qorǵap shyqtym. Qajymuqan atamyzdyń taǵdyry qandaı qıyn bolsa, kınony da túsirý aýyr boldy. Elimizdegi prokaty aıaqtaldy. Endi Reseıde kórsetiledi. «Bores. Kajymýkan – chempıon mıra» degen ataýmen. О́zbekstan men Qyrǵyzstanda dýblıaj jasalyp jatyr», deıdi fılm rejısseri.
Basty rólderdi aǵaıyndy Erbol men Dıas Tólepbergen somdap shyǵady. Balýannyń jas kezin somdaǵan Dıas ta Qaraǵandyǵa arnaıy keldi. Jas akter aǵasy ekeýi 1,5 jyl boıy mamandar ázirlegen rasıonmen tamaqtanyp shyqqandaryn aıtty. Tipti et jeýge shekteý qoıylypty. Bulshyq etin ósirý úshin bodıbıldıngpen aınalysyp, jattyǵý zalynda ter tókken. 2,5 aı kaskaderlik tásilderdi úırenip, fılmde dýblersiz barlyq qımyldy ózderi jasap shyqqan.
Kórsetilim sońynda kınoteatr dırektory Saıat Ábdiǵalı meımandarǵa syı-sııapat jasap, qurmet kórsetti.
Qaraǵandy oblysy
