Kollajdy jasaǵan – Záýresh SMAǴUL, «EQ»
Ádilet mınıstrligi ókiliniń aıtýyna qaraǵanda, mınıstrlik JI arqyly buqaranyń ómir súrýin jeńildetetin birneshe joba ázirlegen. Mınıstrlik atalǵan jobalardy iske asyrý maqsatynda elimizdegi ýnıversıtettermen birigip, jumys tobyn qurǵan. Sondaı-aq spıker aldaǵy ýaqytta IT salasynyń kásipkerlerimen de yntymaqtasa jumys isteýge daıyn ekenin jetkizdi.
– Qazirgi ýaqytta azamattarǵa zańdyq turǵyda táýlik boıy keńes beretin «E-Zan Komegi» mobıldi qosymshasynyń «chat-boty» ázirlenip jatyr. Osy joba arqyly biz halyqtyń quqyqtyq saýatyn arttyryp, olardyń kez kelgen suraǵyna der kezinde jaýap berý múmkindigine ıe bolamyz. Máselen, biz josparlaǵan jobalar tolyqtaı iske qosylǵanda azamattar quqyqtyq kómekti, ıaǵnı zańdyq keńesti úıinde otyryp-aq ala alady, – dedi vıse-mınıstr.
Spıker «E-Zan Komegi» mobıldi qosymshasy advokattar men zańgerlerdiń jumysyn avtomattandyryp, onlaın keńes berý, qońyraýlardy qabyldaý, kezdesý ýaqytyn belgileý, zań qyzmetteriniń túpnusqalyǵyn tekserý sekildi jumystardy atqara alatynyn, bul jumys árdaıym jetildirilip otyratynyn tilge tıek etti. Bolashaqta Ádilet mınıstrligi jyljymaıtyn múlikterdi rásimdeý qyzmetin de JI arqyly onlaın jasaýǵa kóshedi.
– Biz buǵan deıin senimhattardy rásimdeıtin «Enotary» jobasyn iske qostyq. Eki jyl ishinde 67 490 senimhat rásimdelip, júıe jaqsy jumys istedi. Tutynýshylar tarapynan eshqandaı aryz-shaǵym tirkelgen joq. Endi osy joba aıasynda jyljymaıtyn múlikti satý, ıpoteka rásimdeý sekildi birneshe qyzmetti onlaın rejimge aýystyramyz. Azamattarymyz shetelde júrip te úılerin sata alatyn bolady. Al ıpoteka rásimdeý úshin bankke 10-15 ret barýdyń qajeti bolmaıdy, – dedi spıker.
Sondaı-aq vıse-mınıstr «Zanbar» jáne «IPrav» qosymshalarynda advokattar men zań keńesshileriniń reıtıngi bar ekenin túsindirip, QazUTZÝ-men birlesip zań klınıkalaryn ashatynyn, ol júıede jasandy ıntellekt emes, zańgerlerdiń ózi otyratynyn, kez kelgen azamattyń olardan keńes alýyna bolatynyn jetkizdi.
– Bizdiń basty mindetimiz – azamattardyń quqyqtyq qorǵalýy. Árıne, eldegi barlyq adamnyń suraqtaryna jaýap beretin advokat pen zań keńesshisi mamandaryn tabý qıyn. Sondyqtan da turǵyndar tarapynan kóp qoıylatyn suraqtarǵa JI jáne mobıldi qosymshalar arqyly jaýap berý tıimdi bolady. Mınıstrlik aldaǵy ýaqytta osy baǵyttaǵy jumystardy da jandandyra beredi, – dedi Bekbolat Serikuly.
Vıse-mınıstr buqaralyq aqparat quraldary ókilderine 2024 jyly qoldanysqa engen «Robot sot oryndaýshy» jobasynyń da nátıjeli jumys istep jatqanyn jetkizip, naqty derekterdi mysalǵa keltirdi.
– Bizge buryn sot oryndaýshylarǵa qatysty shaǵym kóp túsetin. Máselen, buryn júrgizýshiler «Sergek» kamerasyna túsip qalǵanyn sot oryndaýshy ákimshilik aıyppuldy óndirýge kelgende ǵana bilip, aıyppuldy bir, sot oryndaýshynyń 25 paıyzdyq qyzmetin eki tóleýshi edi. Qazir biz IT tehnologııanyń kómegimen sms-hattar joldaıtyn júıege qol jetkizdik. Iаǵnı aıyppul óndirý jumysyn «robot sot oryndaýshy» tegin isteıdi. Nátıjesinde, 2024 jyldyń tamyz aıynan búginge deıin 454 myń óndiristik is qozǵalyp (9,6 mlrd teńge somasyna), halyqtyń qaltasyndaǵy qarajattan 551 mln teńge únemdeldi, – dedi vıse-mınıstr.
