Áńgime jelisi tarıhı kitaptar jaıyna oıysqan. Amanjol ózi oqyǵan tarıhı týyndylardy tilge tıek etti. Batyr babalardyń on úshinde otaý ıesi, on besinde qolyna qarý alyp eli-jerin jaýdan qorǵaǵanyn aıtty. Onyń sózin ilip áketken Ardaq ózimizdiń áli kúnge deıin etegimizdi jııa almaı, áke-sheshemizdiń jeteginde júrgenimiz – uıat ekenin kúmiljip jetkizdi. Sóıtip, tórteýmiz qazaqtyń azattyǵy jolynda qurban bolǵan Han Kene men jas Naýryzbaı bastaǵan bahadúrlerdiń erligine tańǵaldyq. Abylaı hannyń túsin joryǵan Buqar jyraýdyń áýlıeligine bas ıdik. Aqyry tórteýmiz «Biz kimbiz?» degen suraqqa tireldik. Oılanyp qaldyq.
– Baqa-shaıan.
– Jo-jo-joq, – deıdi Aıdos.
– Qurt-qumrysqa.
– Qalaı?
– Bizden keıin keletin urpaqtar da bar emes pe, – dep kúlip jiberdi, ol.
– Bárimiz de kúldik. Nege? Qurt-qumyrsqa bolǵanymyzǵa ma? Qyzyq…
Saǵynysh
Stýdent kezimde aýylǵa demalysqa kelgen saıyn aldymen atalaryma sálem berýshi edim. Kónekókirek qarııalar soǵan marqaıyp qalatyn. Keıde áńgimege tartyp, bas qalanyń jańalyǵyn suraıdy. Ásirese Arqa tósinde ásem boı kóterip kele jatqan eńseli elorda týraly bilgisi keledi. Birde aýylǵa jazǵy demalysqa kelgende Tóleý atama sálem berdim. Jasy seksenge kelip, tabaldyryqtan alysqa uzaı almaı otyrǵan qart oǵan qýanyp qaldy. Eptep qýaqy ázili bar edi:
– Balam, Prezıdentti kórdiń be?
– Kórdim.
– Jaqyn baryp, sálem berdiń be?
– Joq.
– Qap, Boqan bolsa berdim deı salar edi, – dep Tóleý shal myrs etti.
Onyń bas shaharǵa balalarymen qonys aýdarǵan qurdasy, soǵys jáne eńbek ardageri Boqan qartty aıtyp turǵanyn túsindim. Búginde eki qarııa da aramyzda joq. Olardyń «túıe qarap» ketkenderine biraz jyl boldy. Boqan ákem elordada dúnıeden ozǵanymen uldary súıegin aýylǵa aparyp jerledi. Biraq meniń keýdemde sol atalaryma degen saǵynysh qalyp qoıdy.
