Ernat Seıitqazyuly óndiristegi eńbek jolyn 2016 jyly «Qazaqmys» korporasııasynyń Jezqazǵan baıytý fabrıkasynda bastaǵan. Odan soń Abyz ken ornynda, Qusmuryn-Aqbastaý kenishinde eseli eńbek etti. Qazir «Qazaqmys» jaýapkershiligi shekteýli seriktestigine qarasty Hadjıkongan kareri geologııa bóliminiń taý-ken jumysshysy. Munda vahtalyq ádispen eńbek etip júr. Jeti kún kúndizgi, jeti kún túngi aýysymda jumys isteıdi.
«О́ndiristegi úderis saǵat tili sııaqty úzdiksiz toqtamaýy kerek. Eńbek aǵyny tynymsyz jalǵasa beredi. Sondyqtan jeti qat jer astyndaǵy jumysqa joǵary jaýapkershilikpen qaraımyz. Ásirese tehnıka qaýipsizdigin saqtaý óte mańyzdy. Bireýimiz qatelik jiberip alsaq, barlyǵy birdeı zardap shegedi», deıdi E.Seıitqazyuly.
Eńbekpen jastaıynan shyńdalǵan onyń qolynan kóp sharýa keledi. Qurylysqa da qumbyl. Sharýanyń qaı-qaısysyna bolsyn shıraq. О́ndiris salasyna kelgeninshe túrli jumys atqardy. Degenmen ózi oqyp-toqyǵan mamandyqpen myqtap shuǵyldanyp, sodan bereke tapqysy keldi. Sóıtip, oılaǵany oryndalyp, armany aldynan qarsy jolyqty.
Otbasyna mańdaı ter, taban aqymen tabys ákelip otyrǵan azamat bir qyz, qos uldyń ákesi. Balalaryn da jastaıynan úıdegi sharýaǵa jumsap, eńbekke baýlyp otyrady. «Bilgenderi erteń ózderine jaqsy», deıdi.
Ernat jumystan tys, qoly qalt etken shaqta óleń joldaryn qaǵazǵa túsiredi. Shyǵarmashylyǵyn eńbegimen ushtastyryp, óleń joldary arqyly ómirdiń mán-mańyzyn jetkizip júrgen qalam ıesi. Onyń ár jazǵan óleńinen jan dúnıesin jaryp shyqqan shynaıy týyndyny ańǵarýǵa bolady.
«Bekem bol, kenshi, abaıla,
О́miriń qymbat talaıǵa.
Bastamas buryn jumysty,
Qaýipsiz be eken, sony oıla!
Qaǵamyn belge men qazyq,
Tereńge túsip, ken qazyp,
Josparǵa jetpeı tynym joq,
Berem dep oıla elge azyq!», – degen óleń joldarynan kásibı kenshi men syrshyl aqynnyń júrek sóziniń toǵysqanyn uǵynasyz. О́ndiristi de, ómirdi de qatar jyrlap júrgen Ernat esh ýaqyt qalamyn sýytqan emes. Áriptesteri bir ýaqyt demalyp otyrǵanda óleń oqyp berýge qolqa salady. Sonda Ernat osy bir jyrdy tebirenip turyp, oqyp beredi. Tipti qasynda júrgen eki-úsh kenshi jattap alypty. Sóıtip, qara jumystan qajyǵan jigitterdiń eńsesin qaıta tiktep, rýhyn oıatady. Odan keıin aýylyna, jaqyndaryna jazǵan óleńderin joldaıdy. Osylaısha, kásibı kenshi jerastynda ken qazyp qana qoımaı, jelpinip jyr oqyp ta júr.
Eńbektiń qaratorysy bolǵan Ernat mádenıetke tipti jaqyn. Kenshiler qalasynda ótetin ádebı, shyǵarmashylyq kesh, konsertterdiń qashanda bel ortasynda júredi. О́nerdi óte qatty baǵalaıdy.
«Kúnbe-kún adam kózine ilige bermeıtin, qara nar ǵana tartatyn qajyrly jumysty taq turyp atqaryp júrgen kenshiler qaýymyna qurmetpen qarap, bıylǵy jyldy Jumysshy mamandyqtary jyly dep jarııalaǵan Memleket basshysynyń baǵdary kóp jaıdan habar beredi. О́mirimniń mánin de, baryn da óndiristen taptym. О́leńimdi de óltirmedim. Elense, eńbek adamy elensin. Qaı jerde de olardyń tynymsyz tirligi laıyqty baǵasyn alyp, júrgen-turǵany elge úlgi bolsa, keıingi jastarymyz da eńbekke degen kózqarasyn túzete túsedi», deıdi Ernat.
Qaraǵandy oblysy
