Polısııa departamenti oblys aýmaǵynda «Nashaqorlyqqa jáne esirtki bıznesine qarsy kúrestiń 2023–2025 jyldarǵa arnalǵan keshendi josparyn» iske asyrý aıasynda basqa quzyretti organdarmen birlesip, esirtkiniń zańsyz aınalymyna qarsy kúreste aıtarlyqtaı nátıjege qol jetkizilgenin málimdedi. Jedel-profılaktıkalyq is-sharalar arqyly oblys polıseıleri byltyr 665 esirtki qylmysynyń jolyn kesip, zańsyz aınalymnan 400 kıloǵa jýyq esirtki zattaryn tárkiledi.
Máselen, jedel ýákilder Ordabasy aýdanynda medısınalyq mekemeniń kúzetshisin ustady. Onyń kóliginen 2400-den asa «Tramadol» tabletkasy tárkilenip, sotqa deıingi tergeý jumystary júrgizilip jatyr. Sondaı-aq zańsyz aınalymnan 4 kılodan asa sıntetıkalyq esirtki tárkilengen. Iаǵnı polısııa «sıntetıkanyń» 8 700 dozasynyń taralýyna jol bermedi.
Polıseıler ınternet jelisine monıtorıng júrgizý barysynda «kıberqadaǵalaý» júıesiniń kómegimen 153 esirtki saıtyn anyqtap, buǵattady. Qylmyskerler kóbinese tyıym salynǵan zattardy taratý úshin Telegram-da nemese túrli saıttarda chat-bottar arqyly jumys usynady eken. Osylaısha, jastar «jeńil aqshaǵa» úmittenip, esirtki taratýshylardyń tuzaǵyna túsedi, sońynda jaýapqa tartylyp jatyr. Osy rette polısııa esirtkini jasyryn qoıyp ketti degen kúdikpen 30-dan asa jasty ustady. Bul oraıda tártip saqshylary nashaqorlyqtyń aldyn alý jáne esirtki qylmystaryna qarsy is-sharalardy úzdiksiz uıymdastyryp keledi. Mysaly, oblys polıseıleri belgili sportshylar, ánshiler, qoǵam qaıratkerleri jáne halyq qalaýlylaryn qatystyryp, salamatty ómir saltyna jáne esirtkiden bas tartýǵa shaqyryp, túrli forýmdar men chellendjder jasaýda. Oǵan 50 myńnan asa stýdent pen jergilikti turǵyn qatysqan. Bul baǵyttaǵy jumys aldaǵy ýaqytta da jalǵasady.
Aıta ketelik, jýyrda polısııa departamentiniń bastyǵy Murat Qabdenovtiń tóraǵalyǵymen ótken jıynda jyl basynan beri tirkelgen qylmys sany 501-den 423-ke deıin azaıǵany málim etildi. Qoǵamdyq oryndarda jasalǵan qylmystar – 15,5%, buryn sottalǵandar jasaǵan qylmystar – 30,1%, al mas kúıinde jasalǵan qylmys 30%-ǵa tómendedi. Sonymen qatar tergeýdiń zamanaýı ádisterin engizýdiń nátıjesinde qylmystyq isterdiń ashylýy jaqsardy. Búgingi tańda sottarǵa 225 qylmystyq is jiberildi, al jeńildetilgen is júrgizý tártibimen 11 is joldanǵan.
Túrkistan oblysy
