Ortalyqtyń ashylýy bıyl elimizde ótetin «Qytaı – Ortalyq Azııa» ekinshi sammıtindegi mańyzdy oqıǵaǵa aınalmaq. Munda eki el ǵalymdary arasyndaǵy óńirlik ǵylymı-tehnıkalyq ınnovasııalardy damytýda, ónerkásip salasyndaǵy básekege qabilettiligin arttyrýǵa yqpal etetin jobalar júzege asady.
UǴA prezıdenti, akademık Aqylbek Kúrishbaev birlesken ortalyqtyń zamanaýı múmkindikterin tanystyryp, taıaý keleshekte elimizdiń keńistik-ýaqytqa qatysty derekterdi taldaý jáne turaqty damý salasynda óńirlik kóshbasshyǵa aınalýyna múmkindik beretinin atap ótti. Onyń aıtýynsha, Ortalyq Chjeszıan tehnologııalyq ýnıversıtetimen memorandým aıasynda qurylǵan «Keńistik-ýaqyttyq jasandy ıntellekt jáne turaqty damý jónindegi halyqaralyq birlesken zerthanasyn» damytýǵa yqpal etip, Qazaqstan, Qytaı jáne Ortalyq Azııa elderi arasyndaǵy halyqaralyq ǵylymı yntymaqtastyqty nyǵaıtý jáne ozyq tehnologııalardy damytý baǵytyndaǵy mańyzdy qadamǵa aınalmaq.
Jasandy ıntellekt, qashyqtyqtan zondtaý, geoaqparattyq júıeler jáne boljamdy modeldeý salasyndaǵy ozyq tehnologııalardy biriktiretin zerthana qazirgi zamanǵy syn-tegeýrinder kezeńinde, onyń ishinde klımattyń ózgerýi, tabıǵı resýrstardy basqarý, tabıǵı apattar jáne ekonomıkany sıfrlandyrýda ınnovasııalyq tásilder arqyly tyń sheshimder, zamanaýı qadamdardy anyqtaýǵa múmkindik beredi.
Zerthanany jabdyqtap, qajetti jıhaz, serverlermen qamtamasyz etýdi Qytaı taraby óz mindetine alyp otyr. Mamandardy oqytyp, semınarlar ótkizýmen de Zhejiang university professory Chen Sı bastaǵan ǵalymdar iske asyrmaq.
Jasandy ıntellekt jáne geoaqparattyq júıeler tehnologııalaryn qoldaný arqyly sý resýrstaryna monıtorıng jasaý men basqarý, sý tasqyny, kóshkin sııaqty tabıǵı apattardy erte eskertý júıelerin ázirleý, energetıkalyq resýrstardy ońtaılandyrý, aýyl sharýashylyǵyn sıfrlandyrý jáne «aqyldy eginshilik» boıynsha zertteýlerdi eki eldiń ǵalymdary birlesip, iske asyrady.
ALMATY
