Keshe Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraıymdyq etýimen Qazaqstan halqy Assambleıasy jylyn uıymdastyrý jáne ótkizý jónindegi memlekettik komıssııanyń kezekti otyrysy bolyp ótti.
Onda Mádenıet jáne sport mınıstri A.Muhamedıuly, Aqmola oblysy ákiminiń orynbasary N.Nurkenov, Investısııalar jáne damý vıse-mınıstri S.Sársenov, Prezıdent janyndaǵy «Qoǵamdyq kelisim» respýblıkalyq memlekettik mekemesiniń dırektory N.Kalashnıkova baıandama jasady. Olar Assambleıa jylynda atqarylyp jatqan sharalar týraly birshama aqparat berdi.
Spıkerlerdiń baıandamalarynan belgili bolǵanyndaı, Qazaqstan halqy Assambleıasynyń jylynda aýqymdy sharalar atqarylyp jatyr. Sonyń ishinde 470-ten astam áleýmettik joba qolǵa alynǵan, olarǵa barlyq eldi mekende turatyn 8 mıllıonnan astam adam qatysypty. Atap aıtar bolsaq, 2015 jylǵy 6 aqpanda Astanada, oblys jáne aýdan ortalyqtarynda QHA jylynyń saltanatty túrde ashylýy kezinde 9 respýblıkalyq konkýrstyń bastalýy jarııalanyp, QHA jylynyń jalaýy kóterilgen. Sodan beri respýblıka boıynsha 2 800 eldi mekende 1 mln. 375 myńnan astam adam qatysqan 4 120 is-shara bolyp ótken.
28 aqpanda Elbasynyń Qazaqstan halqy Assambleıasyn qurý týraly Jarlyqqa qol qoıǵanyna 20 jyl tolýyna arnalǵan «Meniń Qazaqstanym» atty Qazaqstan halqynyń forýmy ótkizilgen. Forým aıasynda «Beıbitshilik pen kelisimniń jol kartasy» mega-jobasynyń qorytyndysy shyǵarylǵan. 5-11 sáýir aralyǵynda Shymkent qalasynda Qazaqstannyń etnostyq teatrlarynyń III respýblıkalyq festıvali ótkizilip, otandyq jáne qazirgi zaman avtorlarynyń shyǵarmalarynan qoıylymdar kórsetilgen.
21 naýryzda Astana jáne Almaty qalalarynda, oblystarda Naýryz meıramyna arnalǵan «Bir el – bir taǵdyr» atty QHA festıvalderi ótkizilgen. QHA-nyń iri áleýmettik aksııalary men jobalary da júzege asyrylýda.
Aqpan-sáýir aılarynda «QHA – 20 izgi is» atty respýblıkalyq aksııa ótkizildi. Aksııanyń sımvoly – qasıetti Túrkistan qalasynan jetkizilgen, halyqtyń birligi men berekesin beıneleıtin «Taıqazan» boldy. «Taıqazan» óńirden óńirge «qaıyrymdylyq isterge toltyrylyp», QHA-nyń HHII sessııasy qarsańynda Astanaǵa qaıta oraldy. «QHA – 20 izgi is» aksııasy aıasynda 35 myń adamǵa kómek kórsetilip, aksııa barysynda áleýmettik-mádenı mańyzy bar obektiler salynyp, iske qosylǵan jáne 1000 aǵash otyrǵyzylypty.
Sonymen qatar, «QHA – 20 izgi is» aksııasy aıasynda QHA, etnomádenı birlestikter músheleri sý tasqynynan zardap shekken Qaraǵandy oblysynyń turǵyndaryna kómek kórsetti. Kómek qolyn sozýǵa ashylǵan pýnktterge halyq kóp qaıyryldy. «Qaraǵandy oblysynyń sý tasqynynan zardap shekken turǵyndaryna kómek qory» qoǵamdyq qorynyń arnaıy shotyna 12 mln. 400 myń teńge aýdaryldy. 102 tonna gýmanıtarlyq kómek – azyq-túlik, dári-dármekter, turmystyq hımııa zattary, kıim, jıhaz jóneltildi, kómek kórsetý áli de jalǵasýda.
Respýblıkalyq «QHA – 20 izgi is» aksııasy 2015 jyldyń sońyna deıin jalǵasady.
23 naýryzdan bastap 22 sáýirge deıin 30 kún ishinde elimizdiń 29 eldi mekenin aralap shyqqan «Meniń Qazaqstanym» poıyzy» atty respýblıkalyq aksııa ótkizildi. Aýqymdy áleýmettik aksııanyń maqsaty – Memleket basshysynyń Joldaýlarynyń negizgi taraýlaryn halyqqa túsindirý, «Máńgilik El» jalpyulttyq ıdeıasyn nasıhattaý, turǵyndarǵa medısınalyq, áleýmettik, quqyqtyq qyzmet kórsetý, kásipkerlikti qoldaý, aýyl sharýashylyǵyn damytý týraly keńester berý, mádenı jáne qoǵamdyq, t.b. is-sharalar ótkizý.
Mınıstrlikter men vedomstvolardyń mamandary 4,5 myńnan asa áleýmettik, medısınalyq, quqyqtyq jáne basqa keńester berdi. Qoǵamdyq kelisim keńesteriniń qoǵamdyq qabyldaýlarynda Parlament depýtattary 320-dan asa adamdy qabyldady. Kóptegen máseleler jergilikti jerlerde sheshimin tapty. 9 myńnan artyq adamǵa respýblıkanyń jetekshi mamandarymen medısınalyq kómekter kórsetildi. Jeke marshrýtpen alys beketter men aıaldamalardyń 20 myń turǵynyna «densaýlyq poıyzdary» – «Salamatty Qazaqstan», «Densaýlyq» jáne «Járdem» poıyzdary medısınalyq kómek kórsetti.
Elbasy Nursultan Ábishuly Nazarbaevtyń qoǵamdyq kelisim men birlik úlgisiniń tanystyrylymyna alys eldi mekenderdiń 6 myń turǵyny, «Meniń elim – Máńgilik El!» kórmesine 5 myń 300 adam qatysty. 20 myńnan artyq jas qatysqan patrıottyq aksııalar, flesh-mobtar, KTK oıyndary ótkizildi.Poıyzdyń júrý jolynda QHA-nyń «Teńdessiz syılyq» qaıyrymdylyq aksııasy aıasynda kitaphanalarǵa memlekettik etnosaıasat boıynsha ǵylymı eńbekter tartý etildi.
Assambleıa jylynyń qorytyndysy 2015 jylǵy jeltoqsan aıynda Qazaqstan halqynyń forýmynda shyǵarylady. Memlekettik hatshynyń aldyndaǵy keńeste osy máseleler aıtyldy.
Sondaı-aq, májilis barysynda Qazaqstan halqy Assambleıasy jylynyń aralyq qorytyndylary shyǵarylyp, is-sharalardyń Ulttyq josparyn odan ári iske asyrý jáne Assambleıa qyzmetin aqparattyq jaǵynan qoldaý máseleleri talqylandy.
Otyrystyń qorytyndysy boıynsha Memlekettik hatshy Qazaqstan halqy Assambleıasy jylynyń is-sharalaryn «Barshaǵa ortaq qazirgi zamanǵy memleket» Ult jospary – 100 naqty qadamdaǵy «Birtektilik jáne birlik» tórtinshi ınstıtýttyq reformanyń basymdyǵy aıasynda odan ári iske asyrý jóninde birqatar tapsyrmalar berdi.
Otyrys jumysyna Parlament depýtattary, memlekettik organdardyń ókilderi, respýblıkalyq etnomádenı birlestikterdiń jetekshileri, QHA ǵylymı-sarapshylyq keńesiniń músheleri, buqaralyq aqparat quraldarynyń ókilderi qatysty.
Jaqsybaı SAMRAT,
«Egemen Qazaqstan».
