Almaty onkologııalyq ortalyǵynyń onkolog-ýrology Aıkerim Omarova onkologııalyq keselderdiń kópshiligi asımptomatıkalyq túrde damıtyndyqtan, asqynǵan kezde ǵana anyqtalatynyn aıtady.
«Qýyq asty beziniń qaterli isigin der kezinde anyqtaý úshin jyl saıyn qýyq asty beziniń spesıfıkalyq antıgenine test tapsyrý qajet. Onyń joǵarylaýy isik prosesiniń bastalýyn kórsetýi múmkin. Erte dıagnoz sátti emdeý múmkindigin aıtarlyqtaı arttyrady», deıdi maman.
Nesep-jynys joldarynyń qaterli isigine beıim, qaýipti tobyna 50 jastan asqan, sozylmaly qabyný prosesteri (pıelonefrıt, prostatıt, sıstıt), jaman ádetter, semizdik, tuqym qýalaıtyn keselder, ýly zattardyń áser etý jaǵdaıynda jumys isteıtinder kiredi.
Máselen, 2024 jyly Almatyda 5209 qaterli isik aýrýy tirkeldi. Onyń ishinde 518 jaǵdaı nesep-jynys joldary obyry ekendigi anyqtalǵan. Atap aıtqanda, 218 – qýyq asty bezi obyry, 189 – búırek jasýshaly isigi, 111 – qýyq isigi.
«Aldyn alý jáne der kezinde medısınalyq tekserýden ótý – densaýlyqty saqtaýdyń kepili. Eger sizde zár shyǵarýda qıyndyq bolsa, zárińizden qan kórinip, belińiz aýyrsa, dárigerge barýdy keıinge qaldyrmańyz», deıdi mamandar.
