Bıylǵy nátıjemiz de dál solaı boldy. Ázerbaıjannyń bas shaharynda tatamıge shyqqan 12 balýannyń deni jarty jolǵa jetpeı súrindi. Atap aıtsaq, Ulyqbek Ábilqaıyr (60 kg), Danııar Qulyshev (60 kg), Qanat Seıilhan (66 kg), Ańsarbek Ǵaınýllın (73 kg), Qýanysh Rataev (90 kg), Ermuhan Estaı (100 kg) tusaýkeser kezdesýlerinde jeńilistiń kermek dámin tatty. Ádilbek Berikuly (66 kg) men Dıdar Hamza (90 kg) ekinshi aınalymnan asa almady. Olarǵa qaraǵanda ulttyq quramanyń jeıdesin endi ǵana kıgen Islam Toqtasyn (73 kg) men Meıirjan Jumabek (81 kg) táýir kúresti. Ekeýi de jubanysh beldesýlerge qatysty. Biraq sheshýshi kezeńde olardyń da joly bolmady. Islam grýzııalyq Gıorgı Chıhelıdzeden, Meıirjan ázerbaıjandyq Omar Radjablıden utyldy.
Islam Bozbaev (100 kg) pen Erasyl Qajybaev (+100 kg) syndy saqa sportshylardyń júldegerler qatarynan kórinýge jaqsy múmkindikteri boldy. Shırek fınalda reseılik Bilál Nııazovtan jeńilgen Bozbaev jubanysh básekesinde sol eldiń taǵy bir ókili Muhammed-Álı Mataevqa jol berdi. Al Qajybaev jarady. Áý basta tatamı qojaıyny Jamal Fızıevten basym túsken ol, odan keıin Reseıdiń alyby Temirlan Bashaevpen aıqasty. Olımpııa oıyndary men álem chempıonattarynyń júldegeri, Eýropa chempıony qandasymyzdy ońaı jyqty. Jubanysh beldesýde túrkııalyq Ibragım Tataroǵlyny tize búktirgen Erasyl kóp keshikpeı Saba Inaneıshvılımen kúsh synasty. Bul básekede bizdiń jigit aıqyn jeńiske qol jetkizip, qola medal enshiledi.
Bakýdegi Grand-Slem týrnıriniń jeńimpazdary: 60 kg – Rıýdzıý Nagaıama (Japonııa), 66 kg – Takesı Takeoka (Japonııa), 73 kg – Tasýkı Isıhara (Japonııa), 81 kg – Zelım Sakaev (Ázerbaıjan), 90 kg – Sanshıro Mýrao (Japonııa), 100 kg – Dota Araı (Japonııa), +100 kg – Hega Oota (Japonııa).
