– Dástúrge aınalǵan tazalyq jumysyn sapaly oryndaý úshin barlyq qala, aýdandarda belsendilikti arttyrý, tıisti sharalar qabyldaý qajet. Jaqsy qarqynmen bastalǵan, erekshe nátıje bergen aksııany bir sát te toqtatpaýymyz kerek. Qazir óńirde tazalyq jumysyn júrgizýge aýa raıy da qolaıly bolyp tur. Bar múmkindikti paıdalana bileıik, – degen oblys basshysy aýdan ákimderine óńirlerde aksııaǵa qatysty sharalardy aıaqsytpaı, júıeli jalǵastyrýdy tapsyrdy.
Aksııaǵa oraı ótken jyly arnaıy jospar bekitilip, aýdan, qala, aýyldarda eldi mekenderdi tazalaý, abattandyrý jumysy turaqty júrgizildi. 168 myńnan astam turǵyn qatysyp, 1738 arnaıy tehnıka jumyldyrylǵan senbiliktiń nátıjesinde 27 462 tonna qoqys shyǵarylyp, 69 ruqsat etilmegen qoqys úıindisiniń 61-i joıyldy, teńiz túbin tazartý jumystary júrgizildi.
– «Taza qala» jobasy aıasynda Aqtaý qalasy elimizde 6-oryndy ıelendi. Qazirde «Mono qala» jobasy bastaý alyp, oǵan óńirden Fort-Shevchenko, Jańaózen qalalary, Beıneý aýdany engizildi, – dedi oblystyq tabıǵı resýrstar jáne tabıǵatty paıdalanýdy retteý basqarmasy basshysynyń orynbasary Haıdar Tóleýishov.
Aksııany qarqyndy júrgizýmen úzdikter qataryna engen Aqtaýda kúsheıtilgen sanıtarlyq tazalyq jumysy nátıjesinde 100 tonnadan astam qoqys shyǵaryldy. Oblys ortalyǵyndaǵy shaǵyn aýdandarda sanıtarlyq jumys jalǵasyn taýyp, sharaǵa kommýnaldyq sala qyzmetkerleri men arnaıy tehnıka jumyldyryldy.
– Qaladaǵy sanıtarlyq tazalyq, abattandyrý, jasyl jelekterdi kútip ustaý, jaryq shamdardy jańartý jumystary kúsheıtilgen rejimde jalǵasyp jatyr. Jumystyń nátıjesinde 100 tonnadan astam qoqys shyǵaryldy. Abattandyrý jumysy aıasynda búlingen jaıaý júrginshi joldary (trotýarlar), vandalızm saldarynan qıraǵan oryndyqtar, qoqys jáshikteri qalpyna keltirildi. Sondaı-aq jumysqa shaǵyn aýdandardaǵy kóppáterli turǵyn úılerge qyzmet kórsetýshi mekemeler de atsalysyp jatyr, – dedi Aqtaý qalalyq turǵyn-úı kommýnaldyq sharýashylyǵy bóliminiń sektor meńgerýshisi Aıdar Bısenov.
«Taza Qazaqstan» tujyrymdamasyn iske asyrý jalǵasa beredi, 2024–2029 jyldarǵa arnalǵan arnaıy is-qımyl jospary ázirlengen.
Mańǵystaý oblysy
