Tımýr Bekmambetov: «Týǵan jerden tamyrymdy úzbeımin»

Atyraýda kindik qany tamǵan, Jaıyq jaǵasynda balalyq baldáýreni ótken, búginde Reseıde turatyn ataqty rejısser, sonymen birge, prodıýser Tımýr Bekmambetov týǵan jerine kelip, ákesi Nurýahıtke ornatylǵan memorıaldyq taqtanyń ashylý saltanatyna qatysty. Onyń esimi tek bir elge ǵana emes, álemge keńinen jaıylǵan. Ásirese, «Túngi sholǵynshy» fılmimen tanymal bolǵan Tımýr Bekmambetov týǵan jerine budan on jyl buryn kelgen eken. Sodan keıingi Atyraýǵa kelý sapary, ótken aptada ákesi Nurýahıtke ornatylǵan memorıaldyq taqtanyń ashylý saltanatymen tuspa-tus keldi. Onyń ákesi energetıka salasynda abyroıly eńbek etken. Alysta júrse de týǵan jerin saǵyna eske alatyn Tımýr Bekmambetovtiń aıtýynsha, ol qazir sheteldik MGM kınostýdııasynyń «Ben-Gýr» atalatyn iri jobasyndaǵy jumysyn jalǵastyrýda. – Bul – 2000 jyldyq tarıhy bar óte kóne hıkaıa. Onyń sse­­­na­rııi Lıý Ýollestiń keńi­nen tany­mal bolǵan «Ben-Gýr» klas­sıka­­lyq romanynyń jelisimen ja­zylǵan. Hıkaıa sıýjetinde aǵaıyndy ji­gitter týraly baıandalady. Negizgi túıin – kek pen keshirim jaıly. Hıkaıa­da Morgan Frımen, Djek Hıýston sekildi akterler oınaıdy, – dedi ataqty rejısser jýrnalıs­terge bergen suhbatynda. Sonymen birge, buǵan deıin Tımýr Bekmambetov negi­zin qala­ǵan halyqaralyq «Astana» ekshn-fılmder kınofes­tıva­linde Qazaq­stan tarıhyna negizdelgen birles­ken jobalar jóninde de áńgimelep berdi. Onyń aıtýynsha, ssena­rııler festıvali ótken. Biraq, onda Qazaqstan tarıhyna qatysty emes, ǵarysh týraly úzdik ssena­rııi tańdalypty. Sóıtip, amerı­kalyq Braıan Mıllerdiń ssena­rııi negizinde «Apollo 18» fıl­min túsirýge 5 mln. dollar jumsal­ǵan. Keıin fılmnen 25,2 mln. AQSh dollary kóleminde tabys túsken. Tımýr Bekmambetov budan bylaı týǵan jerine jıi kelýge bekinip otyr. «Jas ulǵaıdy. Bos ýaqyt tabylyp turady. Sońǵy kezderi týǵan jerim tartyp turatyn boldy. Saǵynysh ta bar. Elden tamyrymdy úzgim kelmeıdi», dedi ol. Joldasbek ShО́PEǴUL, «Egemen Qazaqstan». ATYRAÝ. Sýrette: ataqty rejısser Tımýr Bekmambetov týys­tarynyń ortasynda.