Esirtki satqanǵa – aýyr jaza

Qańtar aıynda Jambyl obly­sy­nyń polıseıleri esirtki qyl­mysynyń 40 deregin anyqtady. Onyń ishinde 8-i – asa iri kólemdegi esirtkini zańsyz saqtaý, úsheýi – esirt­ki satý, ekeýi – esirtki ósirý, bireýi – esirtkini nasıhattaý men jar­na­malaý deregi. Sonymen qatar uıym­dasqan qylmystyq topqa qaty­sýdyń bir faktisi tirelgen. Sınte­tıkalyq esirtki óndiretin zerthana uıymdastyrǵan tórt adamǵa qatys­ty qylmystyq is qozǵaldy. Al Taraz qalasynda úndi marıhýanasyn ósiretin zerthana belgili bolyp, qyzmeti toqtatyldy. Oblystyq de­par­tament dereginshe, bir ǵana aıdyń ishinde zańsyz aınalymnan 173 kılodan asa túrli esirtki zaty tárkilengen.

Tártip saqshylarynyń aıtýynsha, sıntetıkalyq preparattardyń taralýyna qarsy kúrestiń tıimdi ádisi – áleýmettik jelilerge monıto­rıng júrgizý. Qańtar aıyn­da «Kıber­nadzor» arqyly 107 ın­ter­net-saıt anyqtalyp, buǵattal­ǵan. Degenmen esirtkimen kúreste qyl­mystyń saldarymen emes, sebebimen jumys istep, quqyq buzýshylyqtyń aldyn alǵan tıimdi. Osyǵan oraı jambyldyq ishki ister organdary múd­deli organdarmen birlesip joǵa­ry jáne orta oqý oryndarynda 113 profılaktıkalyq is-shara ótkizip, buqaralyq aqparat quraldary men áleýmettik jelide 191 materıal jarııalaǵan.

Elimizdiń teriskeıindegi qyzyl­jarlyq tártip saqshylary da keıingi on kún­niń ishinde marıhýana ósiretin bes zert­hanany anyqtady. «Polisia.kz» taratqan derekke súıensek, Soltús­tik Qazaqstan oblysy PD esirtki qyl­mysyna qarsy is-qımyl basqar­masynyń qyzmetkerleri esirtki fıtozerthanalaryn anyqtaý jónin­degi jumystardy kúsheıtken. Nátı­jesinde, taıaý kúnderi quramynda esirtki bar ósimdikterdi zańsyz egip-ósir­di degen kúdikpen Petro­pavl qalasynyń 27 men 47 jas ara­lyǵyndaǵy bes turǵyny anyqtaldy. Olardyń barlyǵy qylmys ústin­de, naqty dálelmen ustaldy. Kúdik­tilerdiń úılerin tekserý kezinde jaryqtandyrý qurylǵylary men basqa da qajetti qural-jabdyq, tuqymdar men qarasora túpteri tabylǵan. Polıseıler olardan 22 túp qarasora, 265 gramǵa jýyq marıhýana men gashısh esirtki zattaryn tárkiledi. Qazirgi tańda tergeý jumystary júrip jatyr.

Aqmola oblysyna qarasty Shýchınsk qalasynda jergilikti polısııa bóliminiń esirtki qylmysyna qarsy is-qımyl bólimshesi qyzmet­kerleri de quramynda esirtki bar ósimdikterdi ósirý úshin óz páterinde fıtozerthana ustaǵan jergilikti turǵyndy quryqtady. Ol tyıym salynǵan zattyń óndirisin jolǵa qoıý úshin ınternet arqyly qajetti jabdyqqa, atap aıtqanda fıtoboks, dıodty sham, fıtolampa, taǵy basqa kerek-jaraqqa tapsyrys bergen. Sonymen qatar qajetti tuqymdy satyp alyp, alǵashqy ónimdi kútip otyrǵan jerinen qolǵa tústi.

Tártip saqshylary onyń úıin teksere kele sur-jasyl tústi, ózindik ıisi bar qorapty taýyp, tergeý is-sharalary barysynda onyń marıhýana ekenin anyqtady. Tárkilengen zattardyń naqty quramy men salmaǵyn anyqtaý úshin saraptamaǵa jiberildi.

Osy oraıda polıseıler 2025 jyldan bastap elimizde esirtki óndirý úshin beriletin jaza ómir boıyna bas bostandyǵynan aıyrýǵa deıin qatańdatylǵanyn eske salady.

Al Abaı oblysynyń polısııa qyzmetkerleri UQK departamentimen birlesip, prokýratýranyń úılesti­rýimen elimizdiń ońtústik óńirinen esirtki jetkizýdiń turaqty arnasyn joıý boıynsha is-shara júrgiz­di. Nátı­jesinde, avtokólikpen iri kólem­de esirtki tasymaldap bara jatqan úsh jergilikti turǵyndy ustaǵan. Olardan naryqtaǵy quny 35 mln teńgeni quraıtyn 110 kılodan asa marıhýana tárkilendi.

Osy fakt boıynsha asa iri kólemdegi esirtkini zańsyz saqtaý, tasymaldaý jáne ótkizý boıynsha qylmystyq top jasaǵan is-áreketke qatysty sotqa deıingi tergeý bastaldy. Kúdiktiler ýaqytsha ustaý ızolıatoryna qamaldy. Aımaqta esirtkiniń zańsyz aınalymyna qarsy kúres belsendi túrde jalǵasyp jatyr.

Aıta keteıik, elimizdiń zańnama­synda esirtki qylmystaryn jasaǵa­ny úshin 14 jastan bastap qylmystyq jaza taǵaıyndalady. Bul – ásirese ata-analar úshin mańyzdy eskertý. Olar balalarynyń qandaı ispen shuǵyldanyp júrgenin jiti qa­daǵalaýy qajet. Eger jasóspirimniń qaltasynda ne kartasynda artyq aqsha paıda bolsa, sabaqtan keıin belgisiz ispen aınalysyp júrgeni anyqtalsa, onyń kúdikti júris-turysyn tekserý kerek. Qyraǵylyq kez kelgen qylmystyń aldyn alýǵa septigin tıgizedi.