Foto: freepik.com
Pavlodar oblysy boıynsha ekonomıkalyq tergep-tekserý departamenti óz úıinde zańsyz onlaın-kazıno uıymdastyrǵan azamattyń isin sot qaraýyna jóneltti. Departament basshysynyń orynbasary Rınat Arǵynbekovtiń aıtýynsha, qylmystyq is QR Qylmystyq kodeksiniń 307-baby (Zańsyz oıyn bıznesin uıymdastyrý) boıynsha qozǵalǵan.
«Er adamnyń úıin tintý barysynda 37 monıtor men 14 júıeli blok, 45 uıaly telefon, 7 noýtbýk, aqshalaı 700 myń teńge jáne 5 myń reseı rýbli, 2 flesh-jınaqtaýysh, 6 dıski, poker oıynyna arnalǵan jınaq tabyldy. Zańsyz onlaın-kazınony departament mamandary ınternet-platformaǵa monıtorıng júrgizý kezinde anyqtady. Ol adamdardy jumysqa qabyldap, táýlik boıy jumys istegen. Árbir segiz saǵat saıyn aýysyp otyrǵan. Áleýetti klıentterine onlaın poker oınaýdy usynyp, utys aqshasyn kartasyna qabyldap kelgen», deıdi Rınat Arǵynbekov.
Er adamnyń zańsyz jolmen tapqan aqshasy tárkilenip, eki jylǵa bas bostandyǵynan aırylýy múmkin.
Pavlodar oblysy
