Saltanatty sharaǵa Aýǵan soǵysynyń ardagerleri men ardagerler keńesiniń ókilderi, Ulttyq ulan men Qazaqstan Respýblıkasy Qarýly Kúshteriniń áskerı qyzmetshileri, áskerı joǵary oqý oryndarynyń kýrsanttary men qala turǵyndary qatysty.
Saıabaqqa jınalǵan qaýym Aýǵan soǵysynda qaza tapqan jaýyngerlerdiń rýhyna bas ıip, olardy bir mınýttyq únsizdikpen eske aldy. Budan keıin aýǵan ardagerleri sóz alyp, soǵys aqtańdaqtary týraly estelikterimen bólisti.
«Men Aýǵanstannyń Bagram eldi-mekeninde toqtaǵan jeke barlaý batalonynda dáriger bolyp qyzmet ettim. «Shepsiz maıdan» atalyp ketken urys qımyldarynda jaraqat alǵan jaýyngerlerge medısınalyq járdem kórsetý basty mindet boldy. Solarmen qoıan-qoltyq júrip, urys ústinde qyzmetimdi atqardym. О́zimiz de jaraqat alǵan kezder boldy. Birde, avtomobılder legimen kele jatqanymyzda Salang asýynan ótkennen keıin modjahetter atqan oqtyń astynda qaldyq. Júrgizýshim Aleksandr Paýtov kólikten shyǵyp, olarǵa qarsy oq jaýdyrdy. Sóıtip meni ajal oǵynan aman alyp qalǵan edi. Barlyq qarýlas joldastaryma jáne olardyń jaqyndaryna úlken rızashylyǵymdy bildiremin. Bul óte aýyr mindet boldy jáne biz ony asa qurmetpen oryndadyq», dedi Ulttyq ulannyń otstavkadaǵy polkovnıgi Sábıt Aımaǵanbetov.
Jıyn sońynda Almaty garnızonyna qarasty áskerı bólimder men áskerı joǵary oqý oryndarynyń kýrsanttary saltanatty sherýmen júrip ótip, jıyn konserttik baǵdarlamaǵa ulasty.
Almaty
