Sapar aıasynda elshi áýejaıdyń jańa halyqaralyq termınalyn aralap, nysannyń ınfraqurylymyn, servıs deńgeıi men óńirdiń avıasııalyq torabynyń damýyna qosqan úlesin joǵary baǵalady. Fransııa men Qazaqstan arasyndaǵy yntymaqtastyq tabysty seriktestiktiń mysaly ekenine toqtalǵan ol, ekijaqty baılanystardy nyǵaıtýdyń mańyzdylyǵyn atap, qos el túrli salalarda áriptestikti qarqyndy damytýdy jalǵastyryp jatqanyn aıta ketti. Ol Qazaqstannyń ınfraqurylymyna, onyń ishinde Almaty áýejaıyn damytýǵa belsendi ınvestısııa salatyn TAV toby sheńberinde Fransııa men Túrkııanyń tabysty yntymaqtastyǵyn mysalǵa keltirdi.
«Fransýz ınvestısııalary Qazaqstan ekonomıkasynda, ásirese avıasııa jáne týrızm sııaqty strategııalyq baǵyttarda mańyzdy ról atqarady. Almaty áýejaıyn halyqaralyq hab retinde damytý óńirdiń týrıstik tartymdylyǵynyń artýyna ǵana emes, Qazaqstan men álemniń qalǵan bóligi arasyndaǵy baılanystardyń jaqsarýyna yqpal etedi», dep atap ótti Sılvan Gıoge.
Sondaı-aq, Qazaqstan jańa halyqaralyq termınal sııaqty jobalardyń arqasynda álemdik avıasııalyq jeliniń mańyzdy býynyna aınalatynyn, bul elge keletin týrıster aǵyny men ınvestısııalardyń kóbeıýine yqpal etetinin atap ótti. «Biz Almaty áýejaıyn jańǵyrtý bastamalaryn qoldaımyz, bul óz kezeginde ekonomıkanyń ósýine ǵana emes, týrızmdi, saýdany jáne halyqaralyq baılanystardy damytýǵa jańa múmkindikter týǵyzady», dep tolyqtyrdy Fransııa elshisi.
Kezdesý barysynda Almaty áýejaıy fransýzdyq kompanııalardyń TAV Airports arqyly áýejaı kapıtalyna janama qatysýyn qosa alǵanda, Qazaqstanǵa salynǵan fransýz ınvestısııalarynyń aýqymdy úlesin quraıtyny aıtyldy.
«Almaty Ortalyq Azııanyń negizgi haby bolyp tabylady, al áýejaı óz kezeginde óńirdiń basty áýe qaqpasynyń rólin atqarady. Fransııa elshisiniń sapary bizdiń memleketter arasyndaǵy ınvestısııalar men ınfraqurylym salasyndaǵy yntymaqtastyqtyń joǵary deńgeıin kórsetedi», dedi QR SIM ókili Jánibek Ábdirashov.
Áýejaı prezıdenti Goker Koseniń aıtýynsha, 2025 jyly halyqaralyq Almaty áýejaıy ınfraqurylymdy keńeıtýge jáne qyzmet kórsetý sapasyn jaqsartýǵa ınvestısııa salýdy jalǵastyra otyryp, 12 mıllıonnan astam jolaýshyǵa qyzmet kórsetýdi josparlap otyr. Jaqyn arada Almatynyń halyqaralyq avıasııalyq hab retindegi pozısııasyn odan ári nyǵaıtý jónindegi strategııalyq maqsattardy kórsetetin aldaǵy jyldarǵa arnalǵan áýejaıdy damytý jónindegi jospar usynylmaq.
«Bizdiń jańa halyqaralyq termınal Ortalyq Azııada «Excellence in Design for Greater Efficiencies (EDGE)» baǵdarlamasy boıynsha sertıfıkattaýǵa ıe bolǵan alǵashqy termınal bolǵanyn maqtan tutamyz. Bul joǵary ekologııalyq standart qana emes, sonymen qatar áýejaıdyń turaqty damýyna jasalǵan mańyzdy qadam. Mundaı jobalar Almatynyń týrızm men halyqaralyq áýe tasymalynyń negizgi ortalyǵy retinde odan ári órkendeýine yqpal etetinine senimdimiz», deıdi Goker Kose.
ALMATY
