Atap aıtqanda:
- Jury Grand Prize (Qazylar alqasynyń bas júldesi)
- Critical Jury Prize (Kınosynshylar alqasynyń júldesi)
- NETPAC Jury Prize (NETPAC qazylar alqasynyń júldesi)
«Ábil» fılmi – keńes odaǵy qulap, «kolhoz-sovhoz tarap, mal-múlik bóliske túsip, elde prıvatızasııa júrgen» kezeńdegi qııanatqa ushyraǵan qarapaıym adamdar men qaraýsyz qalǵan qazaq aýylyndaǵy beıbereket ómirdi sýretteıdi. Sol arqyly kınotýyndy táýelsizdik basyndaǵy kúrdeli ýaqyt aıasyndaǵy qazaq halqynyń rýhanı keıpine, psıhologııalyq kúıine úńiledi. Fılmde adam ómiriniń qunsyzdyǵy, qazaq halqynyń bastan keshken jaǵdaıy, óz jerinde ógeıdiń kúıin keshýi, sosıalızmnen kapıtalızmge aýysý tusyndaǵy ekiudaı sezim, sonymen qatar jemqorlyqtyń paıda bolýy qylań beredi. Úlken tarıhı oqıǵalar kezindegi qarapaıym adamdardyń taǵdyry sýretteledi.
Bıylǵy jylǵy festıvaldyń qazylar alqasynyń tóraǵasy búgingi tańdaǵy álemdik kınonyń eń yqpaldy rejısserleriniń biri, qytaılyq Szıa Chjanke boldy. Onyń «Platforma», «Álem», «Kúnáǵa batý» jáne «Romantık býyn» sııaqty týyndylary halyqaralyq úzdik kınofestıvaldarda joǵarǵy marapattar men baǵaǵa ıe bolǵan. Szıa Chjanke sheberliginiń basty ereksheligi Qytaıdyń áleýmettik bet-beınesin názik túrde zerdeleı sýretteýimen erekshelenedi.
Vesoul halyqaralyq Azııa kınofestıvali – Azııa kınosyna arnalǵan eń kóne jáne eń iri eýropalyq festıvaldardyń biri. 1995 jyly negizi qalanǵan festıval jyl saıyn Azııanyń júzdegen fılmderin Fransııa kórermenderine usyný arqyly olarǵa jas esimderdi tanytyp jáne avtorlyq kınematografııaǵa úlken qoldaý kórsetedi.
Fransýz premerasynda fılmdi rejısser Elzat Eskendir men akter Erlan Tóleýtaı tanystyrdy.
«Ábil» fılminiń álemdik premerasy 29-Býsan halyqaralyq kınofestıvalinde ótken. Odan keıin sapary Gonkong halyqaralyq Azııa kınofestıvali, Skandınavııa óńiriniń eń basty 48-Geteborg halyqaralyq kınofestıvaldaryna qatysýmen jalǵasyp, aýdıtorııanyń úlken qyzyǵýshylyǵyn týdyrǵan. Sonymen qatar aldaǵy ýaqytta da birneshe halyqaralyq kıno alańdaryna shaqyrtý alǵany belgili bolyp otyr.
