Kitaptyń tusaýyn Eýrazııa ulttyq ýnıversıtetiniń akademııalyq máseleler jónindegi prorektory Ardaq Beısenbaı, Ulttyq ǵylym akademııasynyń akademıgi Sherýbaı Qurmanbaıuly, Jazýshylar odaǵynyń Astana fılıaly dırektory, «Túrkistan» gazetiniń bas redaktory Baýyrjan Babajanuly, belgili qalamger Oraz Qaýǵabaı, fılologııa fakýltetiniń dekany, aqyn Serikzat Dúısenǵazy kesti.
Ardaq Beısenbaı qalamgerdiń ómiri men shyǵarmashylyq jolyna qatysty oıyn ortaǵa saldy. «Belgili jazýshy Turlybek Mámeseıit aǵamyz uzaq jyl boıy bizdiń ýnıversıtettiń fılologııa jáne jýrnalıstıka fakýltetterinde ǵalym retinde ónimdi eńbek etip, júzdegen shákirt tárbıeledi. Artynda qanshama ǵylymı jáne ádebı eńbegi qaldy. Aldaǵy ýaqytta sol eńbekterdi ýnıversıtetimizdiń magıstranttary men doktoranttary zerttep, dıssertasııalar qorǵalýy kerek dep oılaımyn», dedi.
Parlament Májilisiniń depýtaty Janarbek Áshimjan Turlybek Mámeseıittiń esimin el esinde qaldyrý máselesine toqtalyp, bastama kóterdi. «О́mirin shyǵarmashylyqqa arnaǵan tulǵa. Turlybek aǵa taýly óńirde mekendegen qarapaıym halyqtyń basynan ótkergen qıly kezeńdi shyǵarmashylyǵyna arqaý etip, el basynan ótken túrli taǵdyrdy qaǵazǵa kesteledi. Qalamgerdiń qaı týyndysyn oqysańyz da, ýaqyttyń tynysyn, adamnyń is-áreketin, keıipkerleriniń minezin tabıǵı bolmysymen qosa sezine alasyz. El aralap, jer kezip, kózben kórip, qolmen ustaǵan dúnıesin kórkem shyǵarmaǵa aınaldyratyn. Turlybek aǵa Astana qalasynyń rýhanı turǵyda ósip-órkendeýine de ólsheýsiz úles qosty. Shákirt tárbıeleý isinde ter tókti. Aldaǵy ýaqytta qalamgerdiń esimin máńgi este qaldyrý maqsatynda ózi turǵan úıdiń qabyrǵasyna eskertkish taqta ornatyp, Jazýshylar odaǵynyń Astana qalalyq fılıalymen birlesip, túrli is-sharany qolǵa alamyz», dep atap ótti.
Kitap tusaýkeserine Almatydan onlaın qosylǵan belgili jazýshy, synshy Nurdáýlet Aqysh pen aqyn Dáýletbek Baıtursynuly qalamger shyǵarmashylyǵy týraly keń mazmundy áńgimelerin aıtty. «Alǵashynda Turlybek Mámeseıit buqaraǵa synshy retinde tanyldy. Syn janrynan «Toǵysqan tolqyn», «Zerdelilik aınasy», «Dıdar», «Tanym tarazysy» kitaptaryn, zertteý baǵytynda «Egiz eldiń áýeni», «Sherhan Murtaza», «Sher men Sherhan» atty eńbekter jazdy. Ol ǵylymǵa da túren salyp, qazaqtyń qaısar uly, qazynaly jazýshy Sherhan Murtazanyń shyǵarmashylyǵyn indete zerttep, fılologııa ǵylymdarynyń kandıdaty atandy. Iаǵnı, birinshiden, qalamgerdiń synshy, zertteýshi baǵytyndaǵy qyryna mán berýimiz kerek. Ekinshi baǵyty – jazýshylyq. О́zi jazýshylyqqa synnan kelgenin jıi aıtatyn. Alǵashqy jazǵan týyndysyn qazaqtyń klassık jazýshysy Saıyn Muratbekov unatyp, batasyn bergen. Sol batadan keıin taý tabıǵatynyń tamyljyǵan kórinisteri men qaharly minezin adam taǵdyrymen, kóńil kúıimen astastyra sýretteı bildi. Úshinshi qyry – dramatýrgııa.
Ol kisi kúrdeli janrǵa da táýekel etip, «Bákeı qyz», «Týlaq», «Tańjaryq», «Qulqynnyń quly» qatarly pesalardy ómirge ákeldi», dedi Dáýletbek Baıtursynuly.
Ádebı is-sharada «Toǵysqan tolqyn», «Zerdelilik aınasy», «Dıdar», «Betoramal», «Túsime taý kiredi», «Besik pen nesip», «Plach ohotnıka», «Áýlıe-shoqy», «Tektiniń kegi», «Taý», «Qarqara kóterilisi», «Jasyn túsken maýsym», «Tańjaryq», t.b kitaptardyń avtory Turlybek Mámeseıit týraly akademık Sherýbaı Qurmanbaıuly, Jazýshylar odaǵy Astana fılıalynyń dırektory, aqyn Baýyrjan Babajanuly, EUÝ fılologııa fakýltetiniń dekany, aqyn Serikzat Dúısenǵazy, t.b. aqyn-jazýshy, ádebıettanýshylar oı-paıymdaryn ortaǵa saldy.
