Prezıdent Q.Toqaevtyń ishki týrızmdi, jolaýshylar áýe tasymalyn damytý, áýe kóligi ınfraqurylymyn jańǵyrtý jónindegi tapsyrmalary aıasynda birqatar mańyzdy jańǵyrý júrdi. 2024 jyly iri habtardy damytý maqsatynda Almaty, Shymkent, Qyzylorda qalalarynda jolaýshylar termınalynyń ótkizý qabileti ulǵaıdy. Sondaı-aq 2025 jyly Zaısan, Katonqaraǵaı kýrorttyq aımaqtarymen birge Kendirlide jańa áýejaı salý týraly tapsyrma berýi de aımaqtyń asa mańyzdylyǵyn bildiredi. Sóıtip, Memleket basshysynyń tapsyrmasyna oraı, Kendirli kýrorttyq aımaǵynan 13 shaqyrym jerden jańa áýejaıdyń qurylysy bastaldy. Kólik mınıstrliginiń aıtýynsha, jobanyń iske asyrylýy óńirlerdegi ekonomıkanyń damýyna tyń serpin berip, otandyq, sheteldik týrıster aǵynyn arttyrýǵa, jergilikti turǵyndardy qosymsha jumys oryndarymen qamtamasyz etýge septigin tıgizetin bolady.
Jańaózen qalasynan 70 shaqyrym qashyqtyqtaǵy Kendirli jeri – Kaspıı teńiziniń jaıdaq jaǵalaýy. Týrızmdi damytýdy basty baǵdar etken óńirde Kendirliniń geografııalyq ornalasýy men aq qum, altyn jaǵalaýly tabıǵaty kýrorttyq, týrıstik qyzyǵýshylyqqa ıe bolatyny anyq. Kendirlide halyqaralyq kýrort ashý maqsatynda arnaıy baǵdarlama jasaqtalyp, 40 myń turǵynǵa meken bolatyn jańa qalanyń Bas jospary jasaldy. Joba boıynsha qoný jolaǵy bar áýejaı, sý tushytatyn zaýyt, elektr stansasy, tazalaý qondyrǵylary, jylyjaılar, ákimshilik, saýda-sattyq ǵımarattary, sondaı-aq jol, gaz qubyry, elektr jelisi syndy ınfraqurylymdyq qajettilikterdi tolyqqandy tartyp, Jańaózen – Kendirli – Túrikmenstan tas jolyn qaıta qurylymdaý, jol boıy servıstik qyzmetter kórsetýdi uıymdastyrý, turǵyndarǵa qajetti áleýmettik nysandar ornatý josparlanǵan. Aımaqta balyq sharýashylyǵy jolǵa qoıylady. 4, 5 juldyzdy qonaqúıler, shıpajaılar men saýyqtyrý lagerleri, akvaparkter, aılaqtar, halyqaralyq deńgeıde sporttyq is-sharalar ótkizýge yńǵaıly stadıon, mádenı keshender men turǵyn úıler salynatyn bolady.
Jańaózen qalasymen birge Kendirli týrıstik aımaǵyn aýyzsýmen qamtamasyz etý maqsatynda Toqmaq múıisinde táýligine 50 myń tekshe metr sý tushytatyn zaýyt qurylysy men 14 qosalqy ǵımarat qurylysy júrip jatyr. Josparlanǵan barlyq jobalar júzege asqan kezde Kendirli keleshegi kelisti shaharǵa aınalmaq.
Mańǵystaý oblysy
