«Keleshek» – bul memleketten bólinetin granttardan bólek, bilim alýǵa qarjylaı kómek kórsetetin júıe. Iаǵnı ata-analar balalary úshin arnaıy bilim jınaqtaý shotyn ashyp, qarajat jınaqtaı alady. Bala 5 jasqa tolǵan kezde memleket bastapqy bilim kapıtaly retinde 60 AEK (235 920 teńge), al ata-anasynyń qamqorlyǵynsyz qalǵan jetim balalarǵa 120 AEK (471 840 teńge) kóleminde qarajat aýdarady. Sondaı-aq jyl saıyn 5-7% mólsherinde memlekettik syıaqy, ómirdi saqtandyrý kompanııasynyń ınvestısııalyq tabysy tólenedi. Atalǵan qarajatty joǵary bilim alý maqsatynda jumsaýǵa bolady, ıaǵnı, bul balalarǵa erte jastan bastap bolashaqtaǵy oqýyna qajetti qarajatty jınaqtaýǵa múmkindik beredi. Jınaqtalǵan qarajatty elimizdegi jáne sheteldegi ýnıversıtetterge tóleýge múmkindik týady. Biraq bir eskertetin jaıt, «Keleshek» júıesiniń sharty boıynsha, ata-analar jyl saıyn eń keminde 12 nemese 24 AEK mólsherinde mindetti jarna tóleýi qajet. Jetim balalardan jyl saıynǵy jarnalar talap etilmeıdi. Memlekettik granttan túsken qarajatty joǵary oqý ornynan keıingi bilim alý úshin paıdalanady. Sonymen qatar jınaqtalǵan qarajatty turǵyn úı sharttaryn jaqsartýǵa nemese qajet kezde úshinshi tulǵalarǵa berýge ruqsat etiledi. Salymshy bilim alatyny týraly qujattardy usynǵan jaǵdaıda, jınaqtalǵan qarajatpen birge, banktiń kapıtaldandyrylǵan syıaqysyn, memlekettik syılyqaqy men bastapqy bilim berý kapıtalyn tolyq kólemde ala alady.
Aıta keteıik, «Coventry University Kazakhstan» – Astanadaǵy tuńǵysh brıtandyq ýnıversıtet kampýsy. Ol «Coventry University Group» quramyna kiredi jáne stýdentterge brıtandyq dıplommen rastalǵan sapaly bilim alýǵa múmkindik beredi. Ýnıversıtet qazir bıznes, kompıýterlik ǵylymdar salasynda bakalavrıat
jáne MBA baǵdarlamalaryn usynady. Aldaǵy ýaqytta oqý baǵdarlamasyna óner jáne dızaın, qurylys menedjmenti, halyqaralyq qatynastar, qarjy salasy sııaqty jańa mamandyqtar engizý josparlanyp otyr.
«Coventry University Kazakhstan» alǵashqylardyń biri bolyp «Keleshek» júıesin qoldady. Bul – bilim salasyndaǵy áleýmettik jaýapkershiligimizdiń bir kórinisi. Bizdiń maqsatymyz – stýdentterge álemdik deńgeıdegi bilim alýyna jaǵdaı jasaý», dedi ýnıversıtet prezıdenti Mıras Dáýlenov.
