«Smart Bridge» dep atalatyn avtomattandyrylǵan júıe sý deńgeıiniń shekten tys kóterilýine jol bermeıdi. Kópirge tónip kele jatqan qaýipti sý kóterile bastaǵannan-aq anyqtap, aldyn ala tirkeıdi. Al arnaıy baǵdarlamamen jumys isteıtin «Arduino» mıkrobaqylaǵyshy kópirdi kóteretin tetikti birden iske qosady.
Onynshy synypta oqıtyn Vıktor munymen ótken jyly kóktemgi sý tasqynynan keıin aınalysa bastaǵan.
«Biz oılap tapqan júıemen qorǵalǵan kópir qandaı dúleı aǵysqa da tótep bere alady. Byltyrǵy tabıǵı sıpattaǵy tótenshe jaǵdaıdan keıin jalpy turǵyndardyń, ınfraqurylymnyń sý tasqynyna qashanda daıyn bolýyna kómektesetin júıe jasap shyǵarǵymyz keldi. Jobany jasaý barysynda kópirdi kóteretin qýatty tetikti tańdaý biraz qıyndyq týdyrdy. Alaıda uzaq izdenistiń nátıjesinde bul qıyndyqty da eńserip, jobamyzdy sátti aıaqtap shyqtyq», deıdi daryndy oqýshynyń ustazy Vıtalıı Bazarkın.
Aldaǵy ýaqytta Vıktor óz ónertabysyn kópir satyly túrde kóteriletindeı etip jáne jedel qyzmetterge avtomatty túrde habarlama jiberetin radıoqurylǵymen jetildirýdi josparlap otyr. Bul qaýip tóngen sátte der kezinde saqtyq sharalaryn qabyldap úlgerýge múmkindik beredi.
Atalǵan joba qazirdiń ózinde joǵary baǵalanyp, «Uly ónertabysqa alǵashqy qadam» respýblıkalyq ınnovasııalyq ıdeıalar baıqaýynda «О́nerkásip salasyndaǵy tehnıkalyq qurylys» atalymy boıynsha birinshi orynǵa ıe boldy.
Qostanaı oblysy
