Astana qalasyndaǵy №6 emhana 2012 jyldyń qarasha aıynda Amanat kóshesiniń boıynda ornalasqan jańa ǵımaratqa kóship keldi. Ǵımarat qazirgi zamanǵy medısınalyq talaptarǵa saı salynǵan. Jańa qural-jabdyqtarmen jabdyqtalǵan. Mundaǵy medısınalyq qyzmetkerler ózderiniń qaltqysyz qyzmetimen halyqtyń alǵysyna bólenýde. Emhana qalanyń ońtústik-shyǵys bóliginde ornalasqan kópqabatty úıler men jeke sektor turǵyndaryna qyzmet kórsetedi.
– Bizdiń jumysymyzdyń negizgi baǵyty medısınalyq qyzmettiń deńgeıi men sapasyn júıeli túrde arttyrý bolyp tabylady. Emhananyń emdeý-dıagnostıkalyq bazasy, qazirgi zamanǵy qural-jabdyqtar ártúrli aýrýlardy joǵary deńgeıde jedel anyqtaýǵa, naýqastardy sapaly emdeýge múmkindik beredi. Emhana qýaty bir aýysymda 500 kelýshige qyzmet kórsetýge laıyqtalǵan. Munda joǵary jáne birinshi sanatty dárigerler jumys isteıdi. Olar jastarǵa tálimgerlik kómekter kórsetip, jalpy jumys sapasynyń artýyna yqpal etip keledi. Qazirgi kúni halyq arasynda júrek-qan tamyrlary aýrýlary, qant dıabetine shaldyqqandar jıi kezdesetini belgili. Sondaı-aq, onkologııalyq aýrýlardyń aldyn alýmen shuǵyldanamyz. Ana men bala densaýlyǵyn turaqty túrde qadaǵalap otyramyz, – deıdi emhananyń bas dárigeri, medısına ǵylymdarynyń kandıdaty Sáken Esbergenov.
Emhananyń jalpy alańy 16 myń sharshy metrge jýyq 3 korpýstan turady. Onyń qurylymyna terapevtik, pedıatrlyq bólimsheler, ártúrli jeke aýrýlarǵa arnalǵan bólimsheler, balalar men úlkenderdiń tis emdeý bólimshesi, aýrýlardyń aldyn alý jáne áleýmettik-psıhologııalyq qyzmetter kiredi. Munda úlkendermen qatar balalar da emdeledi. Sóıtip, emhana qazirgi kúni kóp salaly emdeý mekemesi retinde damytylyp otyr.
Biz emhananyń jalpy tájirıbelik dárigerler bólimshesinde boldyq. Bul bólimshege joǵary sanatty dáriger Beınegúl Baıbolova jetekshilik jasaıdy.
– Bizdiń bólimshede 8 dáriger, 17 medbıke qyzmet etedi. 16 myńǵa jýyq adamǵa qyzmet kórsetemiz. Bul bólimshe ótken jyldyń 1 qazanynda quryldy. 8 aıdyń ishinde tirkelgen halyq sany bizdiń júktememizge sáıkes normalyq deńgeıge shyqty. Qyzmetke jańa oqý bitirgen jastar kelse, olardy qamqorlyǵymyzǵa alyp, jabylyp úıretip, tez qatarǵa qosamyz. Máselen, bólimge kelgen 4 dárigerdiń bizde qyzmet isteı bastaǵanyna bar bolǵany bir jyldaı ýaqyt boldy. Árbir ana men bala nazardan tys qalmaýy tıis. Onyń ústine sońǵy kezderi skrınıngke – aýrýlardy aldyn ala jedel anyqtaý máselesine kóp kúsh jumsaýdamyz. Munyń paıdasy zor. О́ıtkeni, ózin aýrýlardan saýmyn dep esepteıtin keıbir adamdardyń boıynan naýqas belgileri baıqalyp otyr. Jalpy aıtqanda, jumysymyz jeńil emes. О́ıtkeni, qazirgi bilimdi, bilikti, medısınalyq qyzmetke qoıar talaby mol turǵyndardyń kóńilinen shyǵý ońaı emes, – deıdi Beınegúl Batyrbekqyzy.
Beınegúldiń dáriger bolyp qyzmet istegenine 20 jyldan astam ýaqyt bolǵan eken. Júrek aýrýlary boıynsha da arnaıy sertıfıkaty bar. Birneshe ret mınıstrliktiń, basqa da uıymdardyń alǵysyna ıe bolǵan. Dárigerlik paryzyna adaldyǵynyń, biliktiliginiń nátıjesinde 2008 jyly Elbasynyń óz qolynan jańa páter alý qurmetine bólenipti. Qasyndaǵy aǵa-meıirbıke Ajar Ejebekova da jumysqa degen jaýapkershiligi, qaǵylezdigimen kózge túsýde.
Bólimdegi №43 ýchaskeniń otbasylyq dárigeri Azamat Baıbalaevtyń qyzmetke kiriskenine biraz ýaqyt bolǵan. Azamat kelgen naýqastarǵa iltıpatpen, janashyrlyqpen qaraıdy. Qyzmetinde bilikti. Qasyndaǵy meıirbıkesi Gúljan Oıysova bolsa, osy salada biraz tájirıbe jınaqtaǵan. Sondyqtan, olardyń jumysyna naýqastar tarapynan alǵystyń mol ekendigin baıqadyq. Máselen, oǵan ákelip Nurhat, Naıl atty qyzdaryn qaratqan Samal Ermekbaeva emhananyń saıtyna Azamattyń qyzmetine erekshe rıza bolǵanyn jazady. «Altyn adam, óte qaıyrymdy jáne kásiptik turǵydan joǵary bilikti. Mundaı dárigerlerdiń qabyldaýynda bolýdyń ózi kóńilge jaqsy áser etedi», depti ol.
Emhanada dárigerlik qyzmetti jaqsartýǵa baǵyttalǵan túrli sharalar jıi-jıi ótip turady. Máselen, ústimizdegi jyldyń 20 mamyrynda «Emhananyń úzdik meıirbıkesi» atty baıqaý ótti. Munda meıirbıkeler test arqyly ózderiniń kásiptik biliktilikterin synǵa saldy. Toptan ozǵandarǵa júldeli oryndar jáne baǵaly syılyqtar berildi.
Munda, dárigerlerdiń biliktiligin arttyrý maqsatynda túrli semınarlar, leksııalar, densaýlyq mektepteri de jıi ótkiziledi.
Bir sózben aıtqanda, Astana qalasyndaǵy №6 emhana ujymy halyqqa medısınalyq qyzmet kórsetý, túrli aýrýlardyń aldyn alý baǵytynda birkisideı jumylyp, eńbek etýde. Olar ózderiniń tól merekelerine jaqsy daıyndyqtarmen kelip otyr.
Suńǵat ÁLIPBAI,
«Egemen Qazaqstan».
ASTANA.
