Dál osy kúnderi Elordamyzda qursaqishilik kúrdeli operasııalardy jasaý maqsatynda tańdalǵan UMC klınıkasynyń «Ana men bala ortalyǵynyń» Fetaldy medısına bólimshesi barlyq zamanaýı tehnologııalarmen jabdyqtalyp, dárigerlerdiń bilimi jetildirilip jatyr. Oǵan qosa Gasenergy AJQS jelisiniń qarjylaı qoldaýymen bólimshede zamanaýı lazer ornatylyp, fetoskoptar jıyntyǵy berildi.
«Qazaqstanda fetaldy hırýrgııany damytý – bul bolashaq urpaqtyń densaýlyǵyn qamtamasyz etýdegi mańyzdy qadam. Ozyq tehnologııalarmen jabdyqtap, mamandarymyzdyń biliktiligin arttyrýdyń arqasynda biz bolashaq analar men olardyń qursaǵyndaǵy sharanalarǵa joǵary tehnologııalyq medısınalyq kómek kórsete alamyz. Endi júkti áıelder qursaqishilik otalarǵa birden óz elindegi eki ortalyqta qol jetkizedi, bul medısınalyq kómektiń sapasyn arttyryp qana qoımaı, eldiń otandyq densaýlyq saqtaý júıesine degen senimin nyǵaıtady», deıdi QR Densaýlyq saqtaý mınıstrligi Ana men bala densaýlyǵyn qorǵaý departamentiniń dırektory Maǵrıpa Embergenova.
Qazaqstanda fetaldy hırýrgııany damytýǵa baǵyttalǵan jobany UMC-pen jasalǵan yntymaqtastyq týraly mámile aıasynda AYALA Qaıyrymdylyq qory júzege asyryp otyr.
«Biz buǵan deıin de, 2023 jyly UMC-te AYALA qorymen birge Neonataldy oftalmologııa bólimin lazermen jabdyqtaǵan edik, ol dárigerlerge 303 náresteni soqyrlyqtan qutqarýǵa kómektesti. Jańa jobamyz da osyndaı tabysty bolyp, talaı otbasynda deni saý sábılerdiń týýyna septesetininen úmittenemiz», deıdi Gasenergy AJQS jelisiniń operasııalyq dırektory Omar Mýstafın.
Elimizdiń túkpir-túkpirinen kelgen dárigerlerdi oqytý baǵdarlamasyn júrgizýge qarjylaı demeý kórsetip kele jatqan «Shevron» kompanııasynyń eýrazııalyq bólimshesiniń áleýmettik ınvestısııalar jónindegi keńesshisi Leıla Aıtmuhanova: «AYALA qorymen kóp jyldan beri yntymaqtasa otyryp, qol jetkizgen nátıjelerdi maqtan tutamyz. Biz ozyq medısınalyq tehnologııalar men dárigerlerge arnalǵan keshendi oqytý baǵdarlamalaryna ınvestısııa sala otyryp, Qazaqstandaǵy fetaldy hırýrgııanyń sapasyn arttyrýǵa umtylamyz. Bul joba jergilikti deńgeıde asa kókeıkesti, otbasylarǵa shetelden shıpa izdemeı, úzdik medısınalyq qyzmetterdi óz elimizden tabýda mańyzdy qadam boldy», deıdi.
Nazarbaev Ýnıversıtetiniń medısına jónindegi vıse-prezıdenti jáne Medısına mektebiniń dekany Massımo Pınıatellıdiń aıtýynsha, UMC klınıkasynyń «Ana men bala ortalyǵy» bolashaq analardy tereńdetilgen prenataldyq dıagnostıkalaý men odan ári júrgizýdiń barlyq múmkindikterine ıe.
«Árbir bolashaq ana neni armandaıdy? Árıne, deni saý balanyń ómirge kelýin. Osy armandardyń júzege asýy úshin biz otandyq dárigerlerdiń uryq damýynyń eń kúrdeli kemistikterin saraptamalyq dıagnostıkalaýdaǵy bilimderin jetildirý úshin sheteldik jetekshi praktık dárigerlerdi shaqyramyz. ÝDZ-dárigerler men akýsher-gınekologtar birinshi bolyp skrınıngtik tekserýlerde uryqtyń damýyndaǵy kemistikterdi kóredi. Jáne olar asqynǵan kóp uryqty júktiligi bar áıelderdegi patologııalardy qursaq ishinde túzetý úshin jedel jibere alady. Mundaı jaǵdaıda buryn otbasylar operasııaǵa shetelge shyǵý úshin mıllıondaǵan qarajat izdeýge májbúr bolatyn. Qazaqstanda fetaldy hırýrgııanyń damýymen bilikti hırýrgııalyq kómekti Astana men Almatyda alýǵa bolady. Bul densaýlyq saqtaý júıemiz úshin de, sábıdiń ómirge kelýin taǵatsyzdana kútetin árbir otbasy úshin de jaqsy jańalyq», deıdi AYALA Qaıyrymdylyq qorynyń negizin qalaýshy jáne prezıdenti Aıdan Súleımenova.
