Fota: Almaty qalasy Qoǵamdyq densaýlyq saqtaý basqarmasy baspasóz qyzmeti
2025 jylǵy aqpannyń 20-synda Almaty qalasy Balalar shuǵyl medısınalyq kómek kórsetý ortalyǵyna 2 jas 3 aılyq bala bógde zat jutýy múmkin degen kúdikpen jetkizildi. Ata-anasynyń aıtýynsha, shamamen bir apta buryn qonaqqa barǵanda, balanyń metall magnıtti jutyp qoıý múmkindigi bolǵan, biraq magnıttiń naqty sany belgisiz edi.
«Qursaq qýysynyń rentgenografııasy barysynda ólshemi 6,2×2,2 sm bolatyn kóptegen metall zattan quralǵan konglomerat anyqtaldy. Bógde zatty alyp tastaý úshin bala shuǵyl túrde aýrýhanaǵa jatqyzyldy», delingen Almaty qalasy Qoǵamdyq densaýlyq saqtaý basqarmasynyń habarlamasynda.
Áýeli mamandar bógde zatty endoskopııalyq ádispen alýǵa tyrysty, alaıda magnıtterdiń tyǵyz jınalýy kesirinen bul múmkin bolmady. Osyǵan baılanysty hırýrgııalyq aralasý – laparotomııa jáne gastrotomııa jasaý týraly sheshim qabyldandy. Ota barysynda balanyń asqazanynan 105 magnıtti monshaq alyndy.
Otadan keıin bala reanımasııa bólimine aýystyrylyp, keıin hırýrgııa bólimine jatqyzyldy. Qazirgi ýaqytta onyń jaǵdaıy qanaǵattanarlyq.
Almaty qalasy Balalar shuǵyl medısınalyq kómek kórsetý ortalyǵy ata-analarǵa oıynshyqty tańdaýda muqııat bolýdyń mańyzyn eske salyp, balalardyń qaýipsizdigine jiti nazar aýdarýdy suraıdy.
