Jaqynda baspanaly bolǵandar qonystoılaryn toılap, úılerine kirip aldy. Qojalyqtyń qoıyn baǵyp, shóbin shaýyp, arpa-bıdaıyn ósirip, eńbek etip júrgen mehanızator, qoıshy-malshylaryna arnap baspana turǵyzý sharýashylyq basshysynyń kóp jyl oıynda júrse de, onyń sáti byltyrǵy mamyrda tústi. Jarty jyl ishinde keń de jaıly úıler boı kóterip, qojalyqtyń kópbalaly jumyskerlerine tabystaldy. On otbasynyń ishinen baspana kiltin eń birinshi bolyp kópbalaly áke, úzdik kombaınshy Baǵdat Tólemisov aldy.
Eńbekkerleriniń alańsyz jumys isteýine jaǵdaı týǵyzý arqyly S.Orazymbetov birneshe máseleniń túıinin sheshýdi maqsat etip otyr. Ońǵardyń jeri qut bolyp, kásibi tabys ákelgen soń, burynǵy keńshardyń taýarly sút fermasynyń izi bolǵan aýylǵa jan bitirýdi oılady. Úıler salynyp jatqanda, tozyp ketken elektr jelilerin, baǵanalaryn óz esebinen qaıta júrgizgen. Munymen toqtap qalmaı, aldaǵy ýaqytta da eńbekkerlerine arnap úı salýdy jalǵastyrmaqshy. Eger elimizde tabysty jumys istep turǵan ár sharýashylyq «Danııardyń» basshysy sııaqty malshysy men mehanızatoryn laıyqty eńbekaqy, baspanamen qamtamasyz etse, baqýatty aýyldar sany kóbeıe túser edi.
S.Orazymbetov – tynymsyz eńbek pen júıeli uıymdastyrylǵan jumystyń arqasynda zor nátıjege jetken azamat. «Qaramaǵymda 40 shaqty adam jumys isteıdi. Olardyń deni – kombaın, traktor júrgizýshileri, malshylar men qoıshylar. Jumysymyzdy jeti jyl buryn bastadyq. Alǵashqyda Dóń okrýginiń jumyssyz azamattaryn aldyq. Keıin kórshi aýdandardan da kele bastady. Jumys bolǵan soń ártúrli jaǵdaı kezdesedi. Qysy-jazy bir jerde eńbek etýden qashyp, ketip qalǵandar da boldy. Degenmen jumysyna jaýapty adam turaqtap qalady. Onyń jaǵdaıyn jasasaq, basqa jaqta qalǵan bala-shaǵasyna alańdamaıdy. Úıdi sol maqsatta saldyq. Bizge kóbinese ár jerdegi qojalyqtarda jumys istep, durys eńbekaqy ala almaǵandar keledi. Sharýanyń retin, maldyń jaǵdaıyn biletinderdi solardyń arasynan tabamyz. Bir jaǵynan, 80 ǵana turǵyny qalǵan aýyldy jandandyryp, mektebindegi bala sanyn kóbeıtý úshin osyndaı qadamǵa bardyq. Bastama jaqsy nátıje berip jatyr. Múmkindiginshe, sharýashylyqty keńeıtkim keledi. Kóktemde kartop, sábiz, qyryqqabat egýdi josparlap otyrmyz. Kúzde kókónis egetin jerdi jyrtyp qoıdyq», deıdi S.Orazymbetov.
«Danııar» qojalyǵynyń qoıshysy Idiris Jarylǵasynov osy aýyldan úı alǵanyna qýanyshty. «Bizge jumys izdep kelip jatqandardyń arasynda jastardyń bolýy qýantady. Mal baǵýǵa, shóp shabýǵa, traktor aıdaýǵa qulshynys tanytqan jastar kóbeıip keledi. Men ótken jyldyń maýsym aıynda Bógetsaı eldi mekeninen áıelimmen, kishkentaı balammen kóship keldim. Qazir sharýashylyqtyń qoıyn baǵamyn. Alǵan úıimiz óte jaqsy, gaz júrgizilgen, sý kelip tur. Jıhazben, turmystyq tehnıkamen jabdyqtalǵan», deıdi I.Jarylǵasynov.
Aýylda «Danııar» sharýa qojalyǵynyń 20 myń gektar jaıylymdyq jeri bar. Budan ózge 8 myń gektar jerge bıdaı, 1 myń gektarǵa arpa men basqa mal azyǵy daqyldaryn egedi. Aldaǵy ýaqytta bıdaı egistiginiń kólemin 15 myń gektarǵa ulǵaıtpaqshy. Úılesimdi jumys nátıjesinde Ońǵar aýyly jyldan-jylǵa jańaryp keledi. Hromtaý aýdany ákimdiginiń kómegimen aýyldyń kireberis jolyna asfalt tóseldi. Qojalyqqa jańa kelgen otbasylardyń arqasynda toǵyzjyldyq mekteptegi bala sany da ósti. Bul kúnde astyq satyp, qoı ósirip, qomaqty tabys tabý ońaı emes. Eń bastysy, jınalǵan ónimdi ótkize bilý kerek. S.Orazymbetov aldyńǵy jyly asyl tuqymdy qoılaryn shetelge tirideı salmaqpen jiberdi. Byltyr kúzde bıdaıdy Hromtaýdaǵy elevatorǵa tapsyrdy. Isker azamat qazirgi kezde aýyl sharýashylyǵynyń bir salasymen ǵana shuǵyldanýdan góri, ár baǵytta júrgizý tıimdi dep sanaıdy.
Aqtóbe oblysy,
Hromtaý aýdany
