Sońǵy 37 jylda alǵash ret bir jyl ishnde kelýshiler sany 1 097 236 adamǵa jetken. Búginde qalalyq haıýanattar baǵynda 361 túrge jatatyn 3 838 janýar bar. Olardyń kútimimen 223 qyzmetker aınalysady.
2024 jyly 250 myń adam zoobaqty tegin tamashalaǵan. Bul – 6 jasqa deıingi balalar, balalar úıleri men mektep-ınternattardyń tárbıelenýshileri, kópbalaly jáne az qamtylǵan otbasyndǵy balalar, sondaı-aq zeınetkerler men múmkindigi shekteýli jandar.
Haıýanattar baǵy ákimshiliginiń aıtýynsha, mundaǵy bılet baǵasy da qoljetimdi bolyp qala bermek. Atap aıtqanda, eresekter úshin – 800 teńge, al balalar úshin – 300 teńge. Kelýshiler sanynyń jańa rekordyna haıýanattar baǵynyń artyp kele jatqan tanymaldyǵy sebep bolǵan. Ol tabıǵatty súıetinder men otbasylyq demalysty qalaıtyn adamdar úshin tartymdy orynǵa aınalyp otyr.
Aldaǵy ýaqytta haıýanattar baǵyn halyqaralyq standartqa sáıkes jańǵyrtý josparlanǵan. Bıyl jobalyq-smetalyq qujattamany ázirleý boıynsha baıqaý jarııalanady. Keıin kezeń-kezeńimen rekonstrýksııa jumystary bastalyp, 2028 jylǵa deıin jalǵasady.
«Kelýshilerdiń, ásirese balalardyń, qyzyǵýshylyǵyn arttyrý jáne tanymdyq deńgeıin kóterý maqsatynda haıýanattar baǵynda ár janýar boıynsha annotasııalyq taqtaıshalar ázirlengen. Onda janýardyń ataýy, taralý aımaǵy, bıologııalyq erekshelikteri men qyzyqty faktiler kórsetilgen. Barlyq aqparat kelýshilerge yńǵaıly bolý úshin qazaq, orys jáne aǵylshyn tilderinde usynylǵan. Sonymen qatar, haıýanattar baǵynda navıgasııalyq jáne aqparattyq stendter men ınteraktıvti elementter ornatylǵan. Biz balalarǵa arnalǵan túrli úıirmeler men zoomektep jumysyn da uıymdastyryp kelemiz», deıdi haıýanattar baǵynyń ákimshiligi.
