Germanııanyń Berlın qalasynda 4-6 naýryz kúnderi álemdegi eń iri halyqaralyq kórmelerdiń biri – ITB Berlin týrıstik kórmesi ótedi. Dástúrli is-sharaǵa Qazaqstannyń ókilderi de qatysyp, álemge elimizdiń týrıstik áleýetin tanystyrady. 81 sharshy metrdi quraıtyn ulttyq stendte B2B kezdesýler men prezentasııa aımaqtary qarastyrylǵan. Kelýshiler elimizdiń ulttyq taǵamdarynan dám tatyp, týrıstik kórikti jerlerimiz týraly beınerolıkterdi tamashalaı alady.
Kórmeniń saltanatty ashylý rásimine Dúnıejúzilik týrıstik uıymnyń (UNWTO) Bas hatshysy, Dúnıejúzilik saıahat jáne týrızm keńesiniń tóraǵasy, Berlın meri jáne Messe Berlin bas dırektory qatysty. Qurmetti qonaqtar elimizdiń stendtine arnaıy kelip, ulttyq taǵamdarymyzdan dám tatty. Sondaı-aq elimizdiń qonaqjaılyǵy men baı mádenıetin joǵary baǵalady.
Otandyq delegasııa quramynda Týrızm jáne sport mınıstrliginiń, Kazakh Tourism UK AQ, jáne Almaty, Astana, Aqmola, Mańǵystaý oblystary týrızm basqarmalarynyń, qonaq úı bıznesiniń jáne jetekshi týrıstik kompanııalardyń ókilderi bar.
Kórmeniń iskerlik baǵdarlamalary aıasynda otandyq delegasııa ókilderi sheteldik kompanııalarmen ekijaqty kelissózder júrgizip jatyr. Sondaı-aq halyqaralyq týrızmdi damytý jáne Eýropa týrısterin elimizge tartý maqsatynda birqatar kelisimderge qol qoıý josparlanyp otyr.
ITB Berlin halyqaralyq týrıstik kórmesine jyl saıyn 180 elden 10 000-nan astam adam qatysady. Kórmeni 160 000 adam tamashalaıdy, sonyń ishinde 113 500 adam týrıstik sala mamandary. Berlındegi dástúrli kórmege qatysý Qazaqstannyń halyqaralyq baılanysyn nyǵaıtýǵa, jańa kelissózder jasaýǵa jáne eldiń týrıstik áleýetin álemdik naryqtaǵy tanymaldylyǵyn arttyrýǵa múmkindik beredi.
