Eńbek jolyn mektepte bastaǵan S.Mirásilqyzynda memlekettik qyzmetker bolamyn degen oı bolmaǵan. «Bilikti muǵalim atanyp, bilimdi shákirtter tárbıelesem» degen asqaq armany ony 1980 jyly Almaty shet tilder pedagogıkalyq ınstıtýtyna oqýǵa túsiredi. Izdenis ústinde júrgen judyryqtaı qyz qoǵamdyq jumystyń da bel ortasynan tabylady. Iskerlik daǵdyny joǵary oqý ornynda júrip damytqan onyń bul qasıeti ómirlik tájirıbesine qajet edi. Oqýyn úzdik támamdaǵan soń, «nemis, aǵylshyn tili pánderiniń muǵalimi» dıplomymen Kalının atyndaǵy segiz jyldyq mektepke jumysqa qabyldanady. Keıinde Aqtoǵaı aýdandyq orys orta mektebinde, Qyzylaraı aýyldyq mektebinde nemis tilinen sabaq beredi. Sóıtip, alty jyl taqta aldynda turyp, aýyl balalarynyń saýatyn ashyp, til úıretedi. Ustaz bola júrip, komsomol komıteti tapsyrǵan qoǵamdyq jumystarǵa belsene aralasady. Uıymdastyrýshylyq qabiletimen kózge túsken jasty aýdandyq komsomol komıtetiniń ekinshi hatshysy qyzmetine taǵaıyndaıdy. Qyzmette shyńdalǵan S.Mirásilqyzy sekildi talapty kadr aýdandyq partııa komıtetine de kerek edi. Sóıtip, onyń partııa komıtetindegi, aýdan ákimdigindegi qyzmeti sátti bastaldy. Uıymdastyrý bóliminiń nusqaýshysy, halyq depýtattary aýdandyq keńesi apparatynyń saýda, turmystyq qyzmet kórsetý salasynyń aǵa mamany syndy qyzmetter memlekettik qyzmettegi alǵashqy baspaldaǵy boldy.
Odan keıin aýdan ákimdiginiń aǵa referenti, jalpy bólim meńgerýshisi bolyp jumys istep, tájirıbesin odan ári jetildirdi. Aýdan ákiminiń orynbasary qyzmetinde júrip óńirdiń áleýmettik, ekonomıkalyq máselesimen ábden tanys boldy. Keıin Qaraǵandy oblysynyń mádenıet, muraǵattar jáne qujattamalar basqarma basshysynyń orynbasarlyǵyna shaqyrylyp, aımaqtyń rýhanı damýyna eki-úsh jyl eńbek sińirdi.
Keıin Aqtoǵaı aýdanyna qaıtadan ákim bolyp aýysady. О́ńirdiń ár máselesin jetik biletin S.Mirásilqyzy jaýapty qyzmetine bilek sybana kirisedi. Sóıtip, óńirde tuńǵysh aýdan basqarǵan ákim áıel retinde moınyna úlken júk arqalaıdy. Basshylyqqa kelgen kúnnen bastap aýyldy sapaly aýyzsýmen qamtý, ınternet tartý, jol jóndeý sekildi jumysty jandandyrady. Aýdannyń áleýmettik máselesin únemi nazarynda ustaıdy. Eskirgen mádenıet oshaqtary men ákimdik ǵımarattaryn kúrdeli jóndeýden ótkizedi.
«Men ótken memlekettik qyzmettegi mekteptiń eńbek jolyma úlken áseri bar. Alash ardaqtylary shyqqan topyraqta el basqarý isi, árıne, ońaıǵa soqpady. Syndarly sátte el azamattarynyń qoldaýyn tereń sezindim. «Ultqa qyzmet etý – bilimnen emes, minezden», deıdi Alash arysy Álıhan. Osy bir ulaǵatty sóz ómirlik qaǵıdama aınaldy. Eńbegimizge el baǵa bere jatar. Halyqtan ádil synshy joq», deıdi S.Mirásilqyzynyń ózi.
Ákim áıel Alashtyń rýhanı astanasyna aınalǵan asyl mekenniń mádenı damýyna aıtarlyqtaı úlesin qosty. Qajy atanǵan Mirásil ákesiniń aqylymen «Aqsorań» meshitiniń boı kóterýine yqpalyn tıgizdi. Aýdannyń torqaly toqsan jyldyǵyna oraı «Aqtoǵaı aýdany» ensıklopedııasynyń jaryqqa shyǵýyna muryndyq boldy. Osy topyraqtan shyqqan Ekinshi dúnıejúzilik soǵys ardagerlerine arnap memorıaldy keshen ornatyldy. «Batyrlar» saıabaǵyna Keńes Odaǵynyń batyry, ushqysh Nurken Ábdirovtiń eskertkishi qoıyldy. Án men jyrdyń altyn besigine aınalǵan Aqtoǵaıdyń kireberisine «Dombyra» monýmentin salǵyzdy. Mine, isker ákim áıeldiń sońynan osyndaı izgilikti iz qaldy.
Saltanat Mirásilqyzy búginde oblystyń tilderdi damytý basqarmasyna jetekshilik etip otyr. Memlekettik tildiń mártebesin kóterý – ultqa qyzmet etýdiń eń bir ozyq úlgisi.
S.Ábeýovanyń memlekettik qyzmettegi qyryq jyldyq eńbegi eleýsiz emes. Túrli merekelik medaldar, Qurmet gramotalarymen qosa «Úzdik memlekettik qyzmetshi» atty mártebeli marapattyń ıesi. «Eń bıik qurmet – eldiń shynaıy alǵysy. Odan baǵaly qurmet joq», deıdi ózi.
Qaraǵandy oblysy
