Joba aıasynda almatylyq jastar jasandy ıntellekt tehnologııalaryn tegin úırenip, zamanaýı AI-quraldaryn meńgerip, olardy oqý, zertteý jáne bolashaq kásibı qyzmetinde qoldana alady. Oqý baǵdarlamasy mashınalyq oqytý algorıtmderin, neırondyq jelilerdiń negizderin, derektermen jumys isteýdi jáne AI-dy túrli salalarda paıdalanýdy praktıkalyq túrde oqytýdy qamtıdy.
«Jasandy ıntellekttiń damýy – jaı ǵana trend emes, bul Qazaqstannyń álemdik tehnologııalyq arenada belsendi oıynshyǵa aınalýyna aparatyn bolashaqtyń kilti. Almaly aýdanyndaǵy komıýnıtı-ortalyqta JI mektebiniń ashylýy – Almatyda myqty IT-qoǵamdastyq qurý jolyndaǵy mańyzdy qadam. Bul jerde jastar zamanaýı tehnologııalardy meńgerip, ozyq bilimge qol jetkizedi. Biz bul bilimniń jastarǵa tek bolashaǵy zor mamandyqtardy ıgerýge ǵana emes, sonymen qatar ınnovasııalyq sheshimderdi jasaýǵa kómektesetinine senimdimiz», deıdi Qazaq IT Community negizin qalaýshy Ásem Bolatjan.
Eske salsaq, Almatyda jastarǵa arnalǵan 11 komıýnıtı-ortalyq jumys isteıdi, olar qalanyń ár aýdanynda ornalasqan. Árbir komıýnıtı-ortalyq – bul jastardy qoldaýǵa baǵyttalǵan kreatıvti qoǵamdyq keńistik. Munda memlekettik baǵdarlamalar boıynsha keńes berý, psıhologııalyq jáne zańgerlik kómek, NEET-jastarǵa qysqa merzimdi kýrstar arqyly zamanaýı mamandyqtardy úıretý jáne jumyspen qamtý sharalary qarastyrylǵan.
Jastar saıasaty basqarmasynyń qoldaýymen Qazaq IT Community seriktestigi aıasynda júzege asqan jobaǵa jazylý úshin jastar Almaly aýdanyndaǵy komıýnıtı-ortalyqqa júgine alady.
