Qola júlde – kóńilge medeý

Jalpy esepte Norve-gııa quramasyna teń keler komanda tabylmady. Alań ıeleri erler arasynda sarapqa salynǵan alty bas júldeniń barlyǵyn ıelendi. Jalǵyz Iohannes Hıosflot Kle­bonyń ózi jeńis tuǵyryna tórt márte kóterildi. Sonymen qatar klassıkalyq tásildegi komandalyq sprınt pen 4h7,5 shaqyrymdyq estafetada da jerlesteriniń jeńiske jetýine súbeli úles qosty. Sóıtip, Klebo alty birdeı altyn medaldy moınynda jarqyratty.

Áıelder saıysynda Shvesııa shańǵyshylary shashasyna shań juqtyrmaı, alty altynnyń bar­lyǵyn enshiledi. Ebba Anderson men Ionna Sýndlıng úsh, Frıda Karlsson eki retten top jardy.

Skandınavııa túbegindegi saıys­ta elimizdiń birde-bir ókili jeńis tuǵyryna kóterile almady. Bul jaıt elimizde osy sport túriniń jaǵdaıy qanshalyqty múshkil ekenin ańǵartady. Atalǵan salaǵa jaýapty azamattar olqylyqtyń ornyn toltyryp, tyǵyryqtan shyǵýdyń jolyn qarastyryp, shuǵyl túrde sheshim qabyldamasa, onda jeńispen órilgen dástúri bar elimizdegi shańǵy sporty jetistikke jete almasy anyq.

Táýelsizdiktiń tańy atqannan qeıin elimizdiń órenderi tuńǵysh ret 1993 jyly Shvesııanyń Falýn qalasynda boı kórsetti. Sol kezde jasy 30-ǵa taıap qalǵan ataqty sportshymyz Vladımır Smırnov eki kúmis, bir qola medaldy ıe­lenip, barsha jankúıerlerdiń qoshemetine bólendi. 10 shaqyrymǵa klassıkalyq tásilmen júgirýde norvegııalyq Stýre Sıvertsennen qalyp qoısa, 15 shaqyrymdyq básekede dańqy jer jarǵan norvegııalyq Born Delıge ese jiberdi. Smırnov sol Delı men taǵy norveg sportshysy Vegard Ýlvanǵa 20 shaqyrymdyq saıysta da jete almady.

1995 jylǵy jarys Kanadanyń Ontarıo shtatyndaǵy Tender-Beı­de uıymdastyryldy. Bul joly tórtkúl dúnıe jurtshylyǵy Vla­dımır Smırnovtyń teńdessiz ónerine tamsandy. Kókshe óńiriniń týmasy óziniń oń jambasyna ke­letin saıys túrlerinde (30, 10, 10+5 shaqyrym) aldyna jan salmaı, altyn medaldyń úsheýin moınyn­da jarqyratty. Sonymen qosa taǵy bir qolany (50 shaqyrym, erkin tásil) qorjynǵa saldy. Otan­dasymyzdyń osy orasan zor tabysynyń arqasynda elimizdiń quramasy jalpykomandalyq esepte úzdik úshtiktiń qataryna qosyldy. Tek Reseı (5+3+2) men Norvegııany (3+5+1) alǵa jiberdik.

V.Smırnov úlken sporttan qol úzgennen keıin elimizde onyń deńgeıinde óner kórsete alatyn birde-bir shańǵyshy tabylmady. Sonyń saldarynan 1997 jyly Tronheım (Norvegııa), 1999 jyly Ramzaý (Aýstrııa), 2001 jyly Lahtı (Fınlıandııa), 2003 jyly Val-dı-Femme (Italııa), 2005 jyly Oberstdorf (Germanııa), 2007 jyly Sapporo (Japonııa), 2009 jyly Lıberes (Chehııa), 2011 jyly Oslodan (Norvegııa) qorjynymyz bos qaıtty. Tek arada 18 jyl ótkende ǵana qaıta medaldyń syńǵyryn estidik. 2013 jyly Val-dı-Femmede 50 shaqyrymdyq mass-startta shvesııalyq Iýhan Ýlson men shveısarııalyq Darıo Kalonııadan qalyp qoıǵan Alekseı Poltoranın qola medaldy ıelendi. Poltoranın men Nıkolaı Chebotko juby komandalyq sprınte de úshinshi orynǵa taban tiredi. Biraq odan keıingi bes baıraqty básekede baǵymyz janbady.

Taǵy bir aıta keterlik jaıt, Tronheımde parashańǵyshylar da óner kórsetti. Bul saıys­ta elimizdiń quramasyna bir júlde buıyrdy. Onyń ıegeri – Er­bol Hamıtov. Qazaqtyń qaı­sar uly otyryp synǵa túsken sprınt­shilerdiń saıysynda qola medaldy enshiledi.