Depýtat eń aldymen elimizdegi ınvestısııalyq jáne bıýdjettik saıasattyń tıimdiligin arttyrý máselesine toqtaldy.
«Kishigirim eldi mekenderde halyq sany az feldsherlik-akýsherlik pýnktterin salý maqsatynda iri kólemdi jáne qymbat jobalardyń qurylys jumystaryn júrgizý derekteri oryn alyp jatqanyn bilemiz. QHP fraksııasynyń pikirinshe, osyndaı tıimsiz áreket memlekettik pen jekeshelik áriptestik jobalaryna teris áser etip, ınvestısııalyq jáne bıýdjettik saıasatqa keri yqpalyn tıgizedi», dedi ol.
Sondaı-aq M. Magerramov Arhıv jáne kitaphana mekemeleriniń eńbek ujymdarymen ótken kezdesýde jumyskerlerdiń eńbekaqysyn tóleýde áleýmettik ádiletsizdiktiń bar ekenine kóz jetkizgenin atap ótti. Aıtýynsha munyń sebebi olar ártúrli vedomstvolarǵa tirkelgen.
«Mysaly, keıbir aımaqtarda memlekettik kitaphana qyzmetkerleri «mádenıet salasynyń qyzmetkerleri» sanatyna jatqyzylsa, basqalarynda olardy «bilim jáne ǵylym qyzmetkerleri» retinde qarastyrady. Bul máseleni sheshý úshin barlyq kitaphanashylardy bir jumys pozısııalary reestrine qosyp, Qazaqstannyń barlyq óńirlerinde eń joǵary koeffısıent boıynsha jalaqy tóleý qajet», dedi depýtat.
Budan keıin depýtat aptekalyq nashaqorlyqtyń aldyn-alý sharalary joǵary deńgeıde júzege asyrylýy kerektigin aıtty. Sonymen qatar jynystyq zorlyqtyń qurbany bolǵan jandardyń jeke aqparattary jalpaq jurtqa jaıylyp ketpeý amaldaryn kúsheıtý kerektigin eskertti.
«Adam quqyqtary (balalar) ınstıtýtynyń qoǵamdyq uıymdarmen jáne buqaralyq aqparat quraldarymen úzdiksiz, tikeleı jáne tıimdi jumysyn qamtamasyz etý qajet, sondaı-aq zardap shekkender týraly aqparattyń aldyn ala taralýyna jol bermeı, jábirlenýshiniń quqyqtyq qorǵalýyn qoǵam nazarynsyz qamtamasyz etý kerek», dedi sóz sońynda M. Magerramov.
