Sýretti túsirgen – Dmıtrıı Erofeev
Taıaýda oblys ákimi Beıbit Isabaev kórshi memleketterden kelgen birneshe ınvestormen kezdesip, usynys-tilegin qýattady. «Qingdao Wanlin Food Co., Ltd» kompanııasynyń quryltaıshysy ári bas dırektory Lı Iаntao óńirde pııaz óńdeý zaýytyn salý týraly usynys bildirdi.
«Biz óz tarapymyzdan zaýytty ornalastyrý máselesin pysyqtaımyz. Al sizderden bolashaq kásiporynnyń egjeı-tegjeıli jobasyn kútemiz. Árıne, biz úshin ınvestısııa, bıýdjetke túsetin salyq túsimderi mańyzdy, biraq eń bastysy – jergilikti turǵyndardy jumysqa ornalastyrý, olarǵa laıyqty jalaqy tóleý. Jetisý oblysy men QHR-nyń geografııalyq jaǵynan qolaıly ornalasýy birlesken jobalardy iske asyrýǵa múmkindik beredi. Biz ınvestorlarǵa zańdyq negizde qajetti qoldaý kórsetemiz», dedi B.Isabaev.
Sondaı-aq óńir basshysy О́zbekstannyń elimizdegi Tótenshe jáne ókiletti elshisi Bahtıer Ibragımovpen ekijaqty yntymaqtastyqtyń múmkindikteri men áleýetin talqylady.
«Jetisý – agrarlyq aımaq. Sonymen qatar bizdiń oblys tıimdi geostrategııalyq jáne geoekonomıkalyq jaǵynan erekshelenedi. Jetisý – Qytaımen aradaǵy shekarada 5 keden beketi bar respýblıkadaǵy jalǵyz óńir. Batys Eýropa – Batys Qytaı transkontınentaldy avtobany bizdiń terrıtorııa arqyly ótedi. Jalpy, óńirde agroónerkásiptik keshendi damytý, kólik jáne logıstıka, týrızm, balamaly energetıka jáne ónerkásip – jalpy 5 strategııalyq baǵytta ınvestorlar tartý jumystary júrgizilip jatyr», dedi oblys ákimi.
О́z kezeginde Bahtıer Ibragımov jyly kezdesý úshin alǵys bildirip, Jetisýdan et eksporttaýǵa qyzyǵýshylyq tanytyp otyrǵanyn jetkizdi. Sonymen birge sapar aıasynda elshi bastaǵan resmı delegasııa Taldyqorǵanda bıznes-qaýymdastyqpen kezdesti. Sol sııaqty «Qorǵas – Shyǵys qaqpasy» AEA, «Qorǵas» ShYHO, «Nur joly» avtomobıl ótkizý beketiniń jumysymen tanysty.
Qyrǵyz eliniń resmı ókili Jenıshbek Asankýlov kelissóz barysynda aýyl sharýashylyǵy jármeńkelerin, bıznes forýmdardy birlesip ótkizý, týrıstik baǵyttardy damytý, mádenıet jáne bilim salalarynda ózara tájirıbe almasý jaıyn sóz etti. Kezdesý qorytyndysynda Beıbit Isabaev Bas konsýl tarapynan aıtylǵan usynys-tilekterdi qoldaıtynyn, olardy birlesip atqarýǵa, naqty jobalardy qarastyrýǵa daıyn ekenin jetkizdi.
Jetisý oblysy
