– Taýarlardyń elektrondy katalogi qandaı maqsatta qolǵa alyndy?
– Basty mindet – taýarlardy satyp alý úderisin jeńildetý jáne olardy tez ári yńǵaıly etý. Áýelgide katalog tek memlekettik satyp alýǵa qatysýǵa, ıaǵnı avtomatty túrde katalogten alynǵan taýarlarǵa tehnıkalyq sıpattamalardy qalyptastyrý úshin jasalǵan bolatyn. Alaıda biz derekterdi durys jáne tolyq sıpattaı otyryp, taýar, jumys jáne qyzmetterdiń biryńǵaı jiktelýi men sáıkestigin qamtıtyn memlekettik anyqtamalyqtyń nemese katalogtiń joqtyǵyna baılanysty máselege birneshe ret tap boldyq. Arnaıy taldaý kórsetkendeı, túrli anyqtamalyqtar men katalogter bar eken.
– TEK jumysy aıasynda qandaı negizgi maqsattarǵa jetýdi kózdedi jáne onyń tabystylyǵyn aıqyndaıtyn naqty ólshem bar ma?
– Atalǵan máseleniń sheshimin izdeý barysynda aldymyzǵa aýqymdy maqsat qoıyldy: sıfrlandyrý arqyly taýardy óndirý/ımporttaý sátinen bastap ony túpkilikti satýǵa deıingi barlyq sıkldiń ashyqtyǵyn qamtamasyz etý. Jobanyń tabysty bolýy tek bir taýar katalogin memleket pen bıznestiń qoldanýy arqyly anyqtalady.
– Katalog bıznes pen memlekettik organdar úshin taýarlar týraly aqparattyń ashyqtyǵy men qoljetimdiligin arttyrýǵa qalaı áser etedi? Naqty mysaldar keltire alasyz ba?
– Bul – bıznes úshin chekterdegi taýar týraly jáne býhgalterlik júıelerde EShF týraly naqty ári túsinikti aqparat. Keı jaǵdaıda chekte ne jazylǵany túsiniksiz. О́ıtkeni ár dúken taýarǵa baılanysty termınologııany derbes júrgizedi. Sondaı-aq taýar kásiporynǵa nemese memlekettik organǵa túsken kezde júıe avtomatty túrde taýardy qaıda tirkeý keregin kórsetip, kemshilikke jol bermeıdi. Bul óz kezeginde memlekettik organǵa satylǵan taýarlardyń sany men olardyń eldegi baǵasy týraly derekterdi kórýge múmkindik beredi.
– Osyndaı tetikti engizý arqyly zańnamada nemese satyp alý tájirıbesinde qandaı oń ózgerister bolýy múmkin?
– Búginde memlekettik satyp alýlarda «Elektrondy dúken» tásili jolǵa qoıylǵan. Buryn osyǵan sáıkes satylym úderisine tek tórt sanat boıynsha taýarlar qatysa alatyn. Qazir katalogte usynylǵan barlyq taýardyń memlekettik satyp alýǵa qatysýǵa múmkindigi bar. Sondaı-aq Elektrondyq qarjy ortalyǵy biryńǵaı operator retinde «Elektrondy dúken agregatory» deıtin saýda alańdary arqyly satyp alý tetigin ázirledi. Bul satypalymdy 15 mınýtqa deıin qysqartýǵa jol ashyp, taýar kelesi kúnniń ózinde jetkizilýi múmkin. Munyń bári adamnyń qatysýynsyz avtomatty túrde júzege asyrylady.
– Rahmet.
Áńgimelesken –
Abaı AIMAǴAMBET,
«Egemen Qazaqstan»
