Fotolar: Abaı ýnıversıtetiniń baspasóz qyzmeti
Merekelik is-sharaǵa belgili qoǵam qaıratkerleri, qurmetti qonaqtar, BAQ ókilderi, Abaı ýnıversıtetiniń ardager ustazdary, professorlyq-oqytýshylar quramy men ýnıversıtet qyzmetkerleri jáne stýdentter qatysty.
Sharanyń alǵy sózinde Abaı atyndaǵy QazUPÝ Basqarma tóraǵasy - rektor Bolat Tilep: «Táýelsiz el bolǵandyqtan óshkenimiz janyp, úzilgenimiz jalǵasyn taýyp, joǵymyz túgendelip jatyr. Ultymyzdyń rýhanı qazynasy sanalatyn asyl muralarymyzdy jas urpaqqa nasıhattaýdyń da jarqyn úlgisi – osy birligi jarasqan beıbit elimizde kórinis taýyp otyr. «Qaraýsyz qalǵan mazardy shóp basady, qynaptan sýyrmaǵan qylyshty tot basady», degen ataly sóz bar. Olaı bolsa, Naýryz sııaqty salt-dástúrimizdiń mártebesin ústem etý – barshamyzdyń ortaq paryzymyz dep bilemin. Samarqannyń kók tasy erigen kóktemniń osy bir kúninde sizderge dúnıeniń bar jaqsylyǵyn, yrysy men yntymaǵyn tileımin», dep ýnıversıtet ujymyn Naýryz merekesimen quttyqtady.
Merekelik jıyn barysynda ýnıversıtet fakýltetteri qazaq halqynyń kóneden kele jatqan turmys-salty men dástúrlerin kórsetý boıynsha ózara saıysqa túsip, «Dýmandy Naýryz», «Berekeli dastarqan», «Kórikti ulttyq kıim», «О́nerli orta», «Dástúr jańǵyrýy», «Kreatıvti Naýryz», «Ulttyq sport oıyny», «Naýryzdyń qazaq úıi» nomınasııalary boıynsha baq synady.
Sonymen qatar is-shara aıasynda qolóner sheberleri men sýreshiler zergerlik buıym jasaý, ulttyq naqyshtaǵy kórme syndy dástúrdiń úzdik úlgilerin usyndy.
Sondaı-aq, aıtys uıymdastyrylyp, jarapazan aıtyldy. Halyq ánderi shyrqalyp, qazaq bıiniń túrli janrlary oryndaldy, kúmbirlegen kúı shertilip, tól óner keńinen dáripteldi. Ulttyq kıimdegi ónerpazdar sahnanyń ajaryn ashyp, halyqtyń estetıkalyq talǵamyn aıshyqtady.
Kesh barysynda belgili ánshi Qudaıbergen Bekish jınalǵan qaýymǵa ánnen shashý shashty.
