Sýretterdi túsirgen – Erlan OMAR, «EQ»
21 naýryz – Yntymaq kúni. Osy kúnniń qarsańynda Astana qalasyndaǵy Dostyq úıine jol tarttyq. Astana qalasy ákimdigi janyndaǵy «Qoǵamdyq kelisim» mekemesi elordadaǵy túrli etnostardyń basyn qosyp, Naýryz merekesin toılamaq eken. Naýryzdy ǵana emes, Memleket basshysy Qasym-Jomart Toqaevtyń bastamasymen «Naýryznama» tujyrymdamasynyń Yntymaq kúnin atap ótedi.
Birlik pen yntymaqtyń altyn uıasyna aınalǵan Dostyq úıiniń aldy – qaraqurym halyq. Aqshańqan kıiz úıler qaz-qatar tizilip tur. Alańqaıǵa tigilgen altybaqan áýelegen ánge úndese terbeledi. Búrmeli kóılek, oıly kamzol kıip, altybaqan tepken qyzdardyń syńǵyr kúlkisi qulaqty qytyqtaıdy. Boz kilemniń ústinde kúsh synasqan balýandardy qıqýlap qoldaǵan jurt shý-shý etedi. Qol mergendigine úmit artqan balalar asyq oınap, asyr salady. Azdyń azanshysy emes, kóptiń qazanshysy bolýdy qalaıtyn qazaqtyń ulttyq kıimin kıgen túrli etnos ókilderi ersili-qarsyly qydyrystap júr. Júzderinde – shattyq, ezýlerinde – kúlki.
Biz aldymen Bashqurtstanda dúnıege kelip, qyryq jyldan asa ýaqyt qazaq jerinde turyp jatqan bashqurt qyzy Gúzál Súleımenovamen tildestik. Ol: «Naýryz meıramy – dostyqtyń merekesi. Biz jyl saıyn Naýryzdy asyǵa kútemiz. Osy kúni Astana qalasynda turatyn túrli etnos ókilderi bas qosyp, bir-birimizdi quttyqtaımyz. Bul kúndi qazaq, bashqurt, ózbek, uıǵyr sekildi túrki halyqtary ǵana emes, nemis, ýkraın, káristerge deıin toılaıdy. Sebebi biz osy kúni naýryzkóje, baýyrsaq pisirip, ózimizdi qazaq sezinemiz», dep aǵynan jaryldy.
Astana qalasyndaǵy ózbek etno-mádenı ortalyǵynyń tóraǵasy, Ulttyq quryltaı múshesi Sherzod Pýlatov bolsa, Naýryz merekesin Qazaqstan halqy Assambleıasyna qaraıtyn etno-mádenı birlestikter 30 jyldan beri toılap kele jatqanyn, Prezıdenttiń bastamasymen «Naýryznama» tujyrymdamasy bekitilip, 10 kúnniń biri Yntymaq kúni dep tanylǵannan keıin bul meıramnyń máni tipti artqanyn tilge tıek etti.
«Bizdiń memleketimiz osydan 30 jyl buryn Qazaqstan halqy Assambleıasyn quryp, túrli etnostyń basyn qosyp, bárimizdi bir shańyraqtyń astyna jıdy. Menińshe, yntymaq pen birliktiń irgetasy ortaq qundylyqtar qalyptasqanda ǵana berik bolady. Sondyqtan da Prezıdenttiń bastamasymen Naýryzdyń bir kúni yntymaqqa arnalyp, bul meıramnyń birliktiń merekesine aınalǵany bizdi qýantady. Ulttar men ulystar arasyndaǵy syılastyqty kúsheıtip, bir-birimizge degen qurmetimizdi arttyratyn meıramnyń aldymyzǵa qoıǵan uly maqsatqa jetýge jol salaryna senimimiz mol», dedi Sh.Pýlatov.
Tatar-bashqurt mádenı birlestiginiń jetekshisi Sergeı Sadyqov Naýryz merekesine arnalǵan kıiz úılerdi elordadaǵy etno-mádenı ortalyqtar tikkenin aıta kelip, bul meıramnyń basty ereksheligi ulttyq óner men ulttyq oıyndar ekenine toqtaldy.
«О́zderińiz kórip otyrǵandaı, búgin arqan tartý, asyq atý, kúres, gir kóterý sekildi ulttyq oıyndar ótip jatyr. Qazaqtyń ulttyq oıyndary bárimiz úshin qyzyq. Sonymen qatar bul kúni qazaqtyń ánin aıtyp, bıin bılep bir jasap qalamyz», dedi S.Sadyqov.
Tirliginiń tamyryn birlikke baılaǵan elimiz yntymaqtyń buzylmaıtyn qorǵan ekenin azattyqty alǵan kúni shyn túısindi. Taǵdyrdyń jazýymen qazaq jerin panalaǵan túrli etnos ókilderine tizesin batyrmaı, qushaǵyn ashty. Shetten kelgendi shetqaqpaı jasap, jetim qozydaı jáýteńdetpeı baýyryna basty. Dostyq úıi alańynda ótken Naýryz merekesindegi aýra sol saıasattyń durystyǵynyń aıqyn aıǵaǵy sekildi kórindi.
Bizdiń bilýimizshe, Naýryz merekesine ıdeıalyq turǵyda ár beretin Yntymaq kúni elimizdiń ár aımaǵynda dál osylaı toılanyp jatyr hám toılana beredi de.
Memleket basshysy Qasym-Jomart Toqaev Qazaqstan halqy Assambleıasynyń HHHIII sessııasynda «Bárimiz – bir eldiń azamatymyz. Tarıh toǵystyrǵan taǵdyrymyz – bir, senimmen qadam basatyn keleshegimiz – bir. Biz birtutas ult retinde árdaıym babalar amanatyna adal bolamyz. Qasıetti qarashańyraǵymyz – Qazaqstannyń jarqyn bolashaǵyn birge jasaımyz. Bizdiń maqsatymyz aıqyn, bul – Ádiletti Qazaqstandy qurý», degen edi.
Endeshe, Naýryznamanyń 10 kúndigindegi Yntymaq kúnin babalar amanatyna adal bolyp, bir keleshekke nyq qadam basýǵa uıytqy bolar mereke dep tanıtyn kún týyp kele jatyr.
