Ulttyq kıimdi ulyqtaýdy «Egemen Qazaqstan» gazeti de mańyzdy másele retinde nazarynan qalys qaldyrǵan joq. 2024 jyly 18 naýryzda «Ulttyq kıim tek Naýryz aıynyń aıshyǵy ma?» degen taqyrypta maqala jarııalap, qazaqy kıimimizdiń el tarıhy men turmysynan alatyn orny, zamanǵa saı jańara jańǵyrýy, kıimimizge degen qyzyǵýshylyqtyń arta túsýi týraly aıta kelip, kózdiń jaýyn alatyn kórikti kıimderimizdiń kókjıegi tarylyp, tek naýryz aıyndaǵy merekelerde ǵana kıiletinine qynjylǵanbyz. «Ulttyq kıimdi tek toı-tomalaq, naýryz aıynda ǵana emes, únemi kıip júrýdiń nesi ábes? Daý-damaıy, ashyq-shashyǵy kóp qazirgi qoǵamda urpaqty adastyrmaı, baba jolymen tárbıeleımin degender úshin ulttyq kıim – baǵa jetpes baılyq, tárbıeniń ózi. Sheteldikter qyzyqqan qazaq kıiminiń qadirin ózimiz bilip, ózimiz qoldap, ózimiz tutyna júreıik» degen edik.
Quryltaıda Memleket basshysy aıtqan, bir jyl buryn «Egemen Qazaqstan» gazeti kótergen másele bıyl Mańǵystaý óńirinde álemdik deńgeıde uıymdastyrylǵan elimizdiń mádenıetin, dúnıetanymyn, ismerligin nasıhattaıtyn is-sharaǵa arqaý boldy. Naýryz merekesinde, ıaǵnı 22 naýryz kúni Aqtaý qalasynda qazaqtyń ulttyq kıimin kıgen 5 myńnan astam adam aýqymdy ulttyq kıim festıvalin ótkizedi. Joba aıasynda ulttyq kıim kıgen 5 myńnan astam adam «Qazaq ulttyq kıimmen eń kóp adam jınalysy» atalymy boıynsha Álemdik Gınness rekordyn ornatýdy maqsat etti. Sondaı-aq «Best Fest Nauryz» is-sharasyn uıymdastyrý tobynyń jetekshisi Ásemgúl Adambaıdyń aıtýynsha, is-sharanyń maqsaty – qazaq halqynyń biregeı mádenı murasyn álemge tanytý, ulttyq dástúrlerdiń baılyǵyn dáripteý jáne qoǵamdy ortaq qundylyqtarǵa uıystyrý jáne dástúr men jańashyldyqtyń úılesimin kórsetý.
– Is-sharaǵa qatysýshylar kóne nemese zamanaýı úlgide jańartylǵan ulttyq kıimderdi, atap aıtqanda beshpet, jadaǵaı, kamzol, shapan kıedi, al ulttyq baskıim men aıaqkıimdi tańdaý qatysýshylardyń erkinde. Saltanaty jarasqan sherýde fýtbolka, korset, klassıkalyq kostıým, jempir, svıter, zamanaýı stıldegi basqa da kıimderdi kııýge, sonymen qatar kıimge ártúrli jazýlar men sýretter jabystyrýǵa tyıym salynady, dedi mýzeı salasynyń ardageri Tamara Jumalıeva.
Qazaqtyń ulttyq kıimderin kıip, Gınnestiń rekordyn ornatamyn degen topqa jasy 16-ǵa tolǵan elimizdiń azamattary qatysýyna ruqsat etilgen. Az ýaqyt ishinde elimizdiń barlyq óńirlerinen qatysýshylar tirkeldi, tipti Mańǵystaýdyń alys aýyldarynan arnaıy keletin azamattar, ájeler men kelinder az emes. Qazaqstan halqy Assambleıasynan ózge ulttyń 50 ókili qazaqtyń ulttyq kıimimen sapqa qosylady.
Ulttyń rýhyn kóterip, jastar arasynda dástúrge degen qyzyǵýshylyqty arttyratyn jobany seriktes retinde Mańǵystaý oblysynyń ákimdigi «BS Holding» qurylys kompanııasynyń demeýshiligimen ótkizedi.
Kaspıı teńizi jaǵasynda sap quratyn ulttyq kıimdi 5 myńnan astam adam maqsatyna jetip, Gınnestiń rekordtar kitabyna engen jańalyq týraly gazetimizdiń aldaǵy sandarynda buıyrsa, habarlaıtyn bolamyz.
Mańǵystaý oblysy
