Bul merekelik kesh Túrkistan qalasy ákimdiginiń qoldaýymen ótti. Kúndizgi Naýryz toıynyń dýmanynan shabyttanǵan túrkistandyqtar men qala qonaqtary keshki ýaqytta án men jyrdyń merekesine kýá boldy. Túrki dúnıesiniń rýhanı astanasyna aınalǵan kıeli shaharda qazaq estradasynyń jaryq juldyzdary óner kórsetip, halyqqa tamasha kóńil-kúı syılady.
Keshke qazaq mýzykasynyń maqtanyshtary – Roza Rymbaeva men Maqpal Júnisova bastaǵan óner ıeleri qatysty. Bul qos ánshi – qazaq estradasynyń sımvolyna aınalǵan dara tulǵalar. Olardyń oryndaýyndaǵy ásem ánder tyńdarman júregine jetip, árbir tyńdaýshyǵa erekshe áser qaldyrdy.
Sonymen qatar, sahnada Tamara Asar, Ábdijappar Álqoja, Móldir Áýelbekova Aıdar Turǵambek, Aıgúl Imanbaeva jáne Nurbolat Abdýllın syndy taǵy basqa da ánshiler óz ónerlerin ortaǵa saldy. Olar tek tanymal hıt ánderin emes, ulttyq áýender men halyq ánderine negizdelgen erekshe shyǵarmalardy da oryndap, keshtiń sánin keltirdi.
Ásirese, qazaqtyń dástúrli ánderi men zamanaýı óńdeýdegi mýzykalyq qoıylymdar kórermendi erekshe áserge bóledi. Jandy daýystaǵy keremet oryndaýlar, sahnadaǵy ásem bezendirý men jaryq shoýlary konserttiń sánin arttyryp, tyńdarmandy ónerdiń sıqyrly álemine jeteledi.
«Kerýen saraı» kesheni halyqqa lyq tolyp, qala qonaqtary men turǵyndary mýzyka áýenimen terbelip turdy. Túrkistan aspanyn án men jyr terbep, kóktemniń erekshe lebin sezdirdi. Ásirese, halyqtyń súıikti ánshileri sahnaǵa shyqqanda, kórermen birge shyrqap, keshtiń atmosferasyn odan ári jandandyra tústi.
Bul konsert tek ádemi án keshi ǵana emes, ulttyq mádenıetimizdi nasıhattaıtyn, rýhymyzdy asqaqtatatyn úlken merekelik dýman boldy.
